Policia Metropolitane e Londrës do të rrisë përdorimin e dronëve dhe njohjes së fytyrës në kohë reale

Komisioneri i Policisë Metropolitane të Londrës ka njoftuar planet për të rritur përdorimin e dronëve dhe teknologjisë së njohjes së fytyrës në të gjithë kryeqytetin.

Në një fjalim të mërkurën, Komisioneri i Policisë Metropolitane, Mark Rowley paralajmëroi se krimi po "evoluonte me shpejtësi", dhe se shumë kriminelë tani po kalonin në formatin digjital.

"Ata po përdorin mjete më të zgjuara, më të shpejta dhe më të lidhura se kurrë më parë", tha ai.

Për t'iu kundërvënë këtij kërcënimi në rritje, Rowley tha se forcat duhet të përshtaten me teknologjitë në zhvillim, dhe bëri thirrje për një legjislacion më të reduktuar përpara zbatimit të tij.

Ai veçoi dronët dhe njohjen e fytyrës, si veçanërisht të rëndësishme për aftësitë policore të Metropolitane në të ardhmen.

Dronët mund të përdoren nga forcat policore për të ndihmuar në gjurmimin e të dyshuarve, kërkimin e personave të zhdukur dhe mbledhjen e të dhënave të inteligjencës, duke mbështetur oficerët në vendngjarje.

Rowley tha se Met do të zgjeronte programin e saj të dronëve dhe se ai dëshironte mbulim me dronë në të gjitha lagjet e Londrës deri në qershor 2027.

"Ne synojmë të bashkëpunojmë me shërbimet e dritave blu të Londrës, siç është Brigada e Zjarrfikësve të Londrës, për të ndërtuar një rrjet dronësh të shërbimeve emergjente në të gjithë Londrën, idealisht të ndërtuar mbi një infrastrukturë të përbashkët që mbulon të gjithë qytetin", tha ai.

Policia Metropolitane përdor një program për njohjen e fytyrës, për të ndihmuar oficerët e saj të gjejnë njerëzit në "listat e mbikëqyrjes" në kohë reale. Ai përdoret gjithashtu për të ndihmuar oficerët të identifikojnë dikë nëse ai jep të dhëna të rreme, ose dikë pa ndjenja ose të lënduar që nuk është në gjendje të komunikojë.

Rowley, i cili tha se teknologjia kishte çuar në më shumë se 2,000 arrestime që nga viti 2024, njoftoi se policia tani do të përdorë kamera "statike" për njohjen e fytyrës, të cilat do të lidhen me infrastrukturën rrugore dhe do të monitorohen nga distanca.

"Këto kamera do të jenë në gjendje të zhvendosen midis pikave më të nxehta të krimit. Vitin tjetër qëllimi ynë është të vazhdojmë vendosjen e tyre në të gjithë Londrën", tha ai.

Grupi britanik i fushatave për liritë civile, Big Brother Watch, ka kritikuar përdorimin e një teknologjie të tillë.

Grupi i ka quajtur sistemet e njohjes së fytyrës “ndërhyrëse”, “diskriminuese” dhe “jodemokratike”, dhe tha se përdorimi i tyre po “del jashtë kontrollit”.

Silkie Carlo, drejtoresha e grupit, i ka quajtur gjithashtu dromët, si "një formë ekstreme dhe militariste e mbikëqyrjes".

“Policia përdor dronë për të mbikëqyrur dhe për të dhënë urdhra ndaj anëtarëve të publikut, zakonisht është e tepërt dhe kundërproduktive. Parlamenti duhet të vendosë masa mbrojtëse më të forta për të kufizuar përdorimin e tyre”, tha ajo./ Euronews.