Memoriali në Berlin përkujton Dëshmitarët e Jehovait të persekutuar nga nazistët

Një memorial për të përkujtuar Dëshmitarët e Jehovait të persekutuar nga regjimi nazist i Gjermanisë u inaugurua të mërkurën në një park të Berlinit, 81 vjet pas përfundimit të Luftës së Dytë Botërore.

‘Ky memorial u kushtohet njerëzve që vuajtën padrejtësi të hidhura dhe megjithatë, herë pas here, dëshmuan humanizëm’, tha Julia Klöckner, presidente e Bundestagut, gjatë ceremonisë së zbulimit në parkun Tiergarten.

Anëtarët e Dëshmitarëve të Jehovait, një lëvizje fetare me bazë të krishterë që e ka origjinën në SHBA në shekullin XIX dhe që në atë kohë njihej edhe si Studentët e Sinqertë të Biblës, u persekutuan sistematikisht në Gjermani dhe në vende të tjera të Europës gjatë sundimit nazist nga viti 1933 deri në vitin 1945.

Anëtarët refuzuan të bënin përshëndetjen e Hitlerit, nuk iu bashkuan organizatave shtetërore dhe ndihmuan persona të tjerë që po persekutoheshin, sipas fondacionit federal që administron memorialin.

Fondacioni administron gjithashtu memorialin kryesor të Holokaustit në Berlin, një kompleks i madh në qendër të qytetit, i vendosur jo larg memorialit për Dëshmitarët e Jehovait.

‘Pothuajse 14 mijë Dëshmitarë të Jehovait – gra dhe burra – u burgosën, përfshirë 4.200 në kampet e përqendrimit, ku u stigmatizuan me një “trekëndësh të purpurt”’, thuhet në faqen e internetit të fondacionit.

Të paktën 1.750 Dëshmitarë të Jehovait u vranë gjatë diktaturës naziste.

Me një lartësi prej 5 metrash mbi tokë, memoriali prej bronzi është projektuar nga artisti Matthias Leeck për t’i ngjarë një peme që qëndron e palëkundur edhe pse degët i janë prerë.

Memoriali u ngrit pranë pellgut të peshqve të artë në parkun Tiergarten, ku një grup Dëshmitarësh të Jehovait u arrestua nga policia Gestapo më 22 gusht 1936, sipas fondacionit.

Në atë kohë, anëtarët mblidheshin pranë një pike me qira karrigesh afër pellgut për të shkëmbyer fshehurazi informacione.

‘Gestapo kreu bastisjen pikërisht këtu, ku më pas 17 persona të guximshëm humbën jetën’, tha Wolfram Weimer, komisioneri i kulturës i Gjermanisë, gjatë ceremonisë, në të cilën morën pjesë rreth 1.000 të ftuar.

Ligjvënësit votuan në vitin 2023 për ngritjen e një memoriali për Dëshmitarët e Jehovait të persekutuar nga nazistët.

Gjatë aktivitetit, presidentja e Bundestagut, Klöckner, vuri në dukje se edhe pas përfundimit të sundimit nazist, rezervat ndaj disa komuniteteve fetare vazhduan të ekzistonin.

‘Besimi i tyre mbeti i huaj dhe i dyshimtë për shumë njerëz. Persekutimi dhe vuajtjet e tyre nuk u njohën sa duhet’, tha Klöckner, duke shpjeguar arsyen pse u desh kaq shumë kohë për ngritjen e memorialit./ DPA News