Tifozët japonezë rrezikojnë ndëshkim nga FIFA pas incidentit me flamurin ‘Rising Sun’

Tifozët e një kombëtareje në Kupën e Botës 2026 mund të përballen me masa disiplinore nga FIFA, pas dyshimeve për shkelje të protokollit të rreptë të organizatës gjatë ndeshjes Japoni–Tunizi.

FIFA ka përcaktuar qartë para turneut se çdo simbol politik, ofendues apo diskriminues është i ndaluar në stadiume, përfshirë flamuj, pankarta dhe veshje që mund të nxisin tensione apo polemika.

Si shembull i zbatimit të këtyre rregullave, më herët FIFA kishte detyruar Haitin të ndryshonte dizajnin e fanellës së saj, pasi në versionin fillestar ishte përfshirë Beteja e Vertières, një ngjarje historike e lidhur me pavarësinë e vendit.

Megjithatë, gjatë ndeshjes Japoni–Tunizi, në tribuna është vërejtur shfaqja e flamurit “Rising Sun”, një simbol që ka shkaktuar reagime të forta në disa vende aziatike, përfshirë Kinën dhe Korenë e Jugut.

Ky flamur lidhet historikisht me Ushtrinë Perandorake Japoneze gjatë Luftës së Dytë Botërore dhe për shumë vende të rajonit përfaqëson kujtime të dhimbshme të periudhës së pushtimit dhe konfliktit.

Sipas raportimeve, edhe në Kupën e Botës 2022 në Katar kishte tentativa për përdorimin e këtij simboli, por ato ishin ndaluar nga stafi i sigurisë.

Pas incidentit të fundit, profesori Seong-Deok Seo nga Universiteti Sungshin Women’s ka dorëzuar një ankesë zyrtare në FIFA, duke kërkuar masa më të forta.

Ai deklaroi se është e papranueshme që simbole të tilla të shfaqen në një turne që synon bashkimin e kulturave dhe kombeve dhe theksoi se FIFA duhet të veprojë për të parandaluar përsëritjen e rasteve të ngjashme.

Tani mbetet të shihet nëse FIFA do të hapë procedurë disiplinore ose do të ndërmarrë masa parandaluese për ndeshjet e ardhshme të turneut.