Nga dentisti i Kepit të Gjelbër te bariu i Iranit, historitë e portierëve të panjohur që u bënë ‘yje’ në Botëror

Vozinha ka fituar zemrat e tifozëve dhe miliona ndjekës falë pritjeve kundër Spanjës, ndërsa jeta si në film e Beiranvandit, rekordi i Room për Kurasaon dhe histori të tjera po tërheqin vëmendjen në Kupën e Botës 2026.

Të gjithë sytë janë te Lionel Mesi, Kylian Mbape, Erling Haaland dhe Lamine Yamal. Në pritje të Cristiano Ronaldos, yjet më të mëdhenj të futbollit nuk po zhgënjejnë në Kupën e Botës 2026. Megjithatë, përveç sulmuesve që pushtojnë titujt kryesorë, në këtë Botëror po shkëlqejnë edhe disa portierë që deri pak javë më parë ishin pothuajse të panjohur për publikun e gjerë.

Formati me 48 kombëtare, i kritikuar nga shumëkush, ka sjellë në qendër të vëmendjes histori të jashtëzakonshme futbollistësh. Mes portierëve të skuadrave më modeste gjen dentistë, barinj, ish-lojtarë softballi dhe rezerva që mezi kanë luajtur gjatë sezonit me klubet e tyre. Disa kanë fituar miliona ndjekës në rrjetet sociale, të tjerë shpresojnë të sigurojnë kontrata të reja, por të gjithë e dinë se vështirë se do të kenë sërish një skenë kaq të madhe.

Vozinha, dentisti i Kepit të Gjelbër që hyri në histori

Josimar Dias, i njohur si Vozinha, është portieri 40-vjeçar i Kepit të Gjelbër. Babai i tij e pagëzoi sipas Josimar Pereirës, mbrojtës i Brazilit në Botërorin e vitit 1986. Fillimisht dëshironte ta quante Jorge Valdano, sipas sulmuesit argjentinas, por kërkesa u refuzua nga gjendja civile sepse emri ishte i huaj.

Pseudonimi “Vozinha” lindi nga lotët që derdhte në shtëpinë e gjyshes pasi ngacmohej nga bashkëmoshatarët. Megjithatë, ai nuk u dorëzua. E nisi karrierën profesioniste vetëm në moshën 25-vjeçare në Angola, ndërsa ndërkohë u diplomua edhe si dentist.

Në debutimin e Kepit të Gjelbër në këtë Botëror ai ndali Spanjën me një seri pritjesh spektakolare. Brenda pak orësh fitoi 10 milionë ndjekës në Instagram. Aktualisht është pa skuadër pas aventurës në Serinë B portugeze me Chaves. Historia e tij, e pasuruar edhe nga ardhja e nënës në ndeshjen e dytë pasi fillimisht iu refuzua viza, ka prekur zemrat e tifozëve në stadium dhe para televizorit.

Room, rekordmeni i Kurasaos

Eloy Room është 37 vjeç dhe mbron portën e Kurasaos. Pas shtatë golave të pësuar ndaj Gjermanisë, ai ishte vendimtar në barazimin 0-0 kundër Ekuadorit, ku vendosi një rekord botëror me 15 pritje në një ndeshje 90-minutëshe.

“Duhet të më ngrejnë një statujë në Kurasao”, deklaroi ai pas ndeshjes.

I lindur në Holandë, Room zgjodhi të përfaqësonte Kurasaon falë origjinës së babait dhe ftesës së trajnerit të atëhershëm Patrick Kluivert. Pasi u formua te Vitesse dhe luajti edhe për PSV-në, sot është pjesë e Miami FC.

Në vitin 2023 ai u përball me Lionel Mesin në kombëtare dhe pësoi shtatë gola, tre prej tyre nga argjentinasi. Megjithatë, Mesi i dhuroi fanellën pas ndeshjes.

“Ishte një ndeshje shumë e vështirë. Pësova shumë gola, por edhe prita disa goditje të Messit. Ato pamje do të më vlejnë për YouTube”, kishte thënë me humor portieri.

Kur Alireza Beiranvand paraqitet në Kupën e Botës, rrallëherë kalon pa u vënë re. Portieri 34-vjeçar i Iranit bëri bujë në vitin 2018 kur priti penalltinë e Cristiano Ronaldos. Pak ditë më parë ai ishte vendimtar edhe kundër Belgjikës, duke ndalur një mori rastesh nga Romelu Lukaku, Kevin De Bruyne dhe Maxim De Cuyper.

Historia e tij është e jashtëzakonshme. Si fëmijë ishte i destinuar të bëhej bari. Babai i tij i priste dorezat dhe fanellat për ta detyruar të përqendrohej te puna. Alireza stërvitej duke hedhur gurë dhe më vonë u largua nga shtëpia.

Për të mbijetuar punoi si bukëpjekës, rrobaqepës dhe larës xhamash makinash. Falë gjatësisë prej 1.98 metrash, u specializua në pastrimin e SUV-ëve. Pikërisht aty pati rastin të shihte legjendën iraniane Ali Daei.

Shumë i turpshëm për t’i folur, ai zgjodhi një rrugë tjetër. Për javë të tëra flinte jashtë qendrave sportive të Teheranit duke pritur një mundësi prove. Përfundimisht ia doli. Nga Naft Teherani kaloi te Persepolisi, pati një eksperiencë të shkurtër tek Antwerpi në Belgjikë dhe më pas u rikthye në Iran te Tractori.

Jeta e tij ishte aq e veçantë sa në vitin 2022 u realizua filmi “Beyro”, kushtuar historisë së tij. Ai mban gjithashtu një rekord në Librin Guinness për hedhjen më të gjatë me dorë në një ndeshje futbolli: 61.26 metra.

Beach, nga softbolli te porta e Australisë

Patrick Beach mbërriti në Botëror si kandidat për portierin e tretë të Australisë, por përfundoi duke fituar vendin e titullarit. Ai la pas veteranin Mathew Ryan dhe debutoi me sukses në fitoren 2-0 ndaj Turqisë, ku realizoi disa pritje të rëndësishme.

Edhe pse nuk arriti të bënte diferencën në humbjen 2-0 kundër SHBA-së, ai mbetet një nga surprizat më të bukura të turneut.

23-vjeçari i Melbourne City-t deri në moshën 15-vjeçare e ndante kohën mes futbollit dhe softballit, ku konsiderohej një talent premtues. Vetëm sezonin e fundit shpërtheu si portier, fitoi kampionatin australian, debutoi me kombëtaren në nëntor dhe tani po jeton ëndrrën e Botërorit.

Rasti i veçantë i Skocisë

Skocia ka zgjedhur një rrugë të pazakontë. Të tre portierët e saj janë rezerva te klubet respektive dhe së bashku kanë grumbulluar vetëm shtatë paraqitje gjatë sezonit 2025/26.

Angus Gunn luajti vetëm 45 minuta me Nottingham Forestin në Premier League, Liam Kelly u aktivizua tri herë në kupë me Rangersin, ndërsa Craig Gordon, 43 vjeç dhe lojtari më i moshuar i Botërorit 2026, zbriti në fushë vetëm tri herë me Hearts.