Studimi: Nëse 9 nga 10 njerëz janë djathtakë, shkaku është evolucioni njerëzor

Një qëndrim i drejtë dhe një tru gjithnjë e më i madh: këto janë dy shkaqet që kanë bërë që 90% e njerëzve të përdorin dorën e djathtë, një karakteristikë unike për speciet tona.

Kjo tregohet nga një studim i botuar në revistën Plos Biology nga Thomas Püschel i Universitetit të Oksfordit.

Fakti që afërsisht 90% e të gjithë njerëzve, nga çdo vend dhe kulturë, preferojnë dorën e djathtë është diçka absolutisht e pazakontë midis primatëve, një preferencë e qartë për njërën dorë që nuk gjendet tek asnjë specie tjetër. Është një fenomen që ka qenë gjithmonë një mister edhe për biologjinë evolucionare.

Një përgjigje e mundshme tani vjen nga një studim i studiuesve britanikë, të cilët shqyrtuan dhe krahasuan të dhënat e sjelljes dhe karakteristikat e 41 specieve primate, përfshirë njerëzit, duke arritur në përfundimin se preferenca për dorën e djathtë e kishte origjinën te paraardhësit tanë hominidë dhe më pas gradualisht u bë më e theksuar .

Gjithçka mund të gjurmohet që nga fillimi i ecjes me dy këmbë , sepse kur filluam të ecnim drejt, duart tona ishin në gjendje të çliroheshin nga detyra e të ecurit dhe filluan të specializoheshin në veprime të reja.

Sipas autorëve të hulumtimit, hominidet e hershme si Ardipithecus dhe Australopithecus treguan vetëm një predispozitë të lehtë për të qenë djathtak, e cila u rrit ndjeshëm me Homo erectus dhe Neandertalët përpara se të arrinte kulmin te Homo sapiens.

Vetëm më vonë kjo karakteristikë u konsolidua përfundimisht, me zgjerimin dhe riorganizimin e trurit, i cili u specializua në menaxhimin e shumë aktiviteteve me një dorë të vetme./ ANSA.