Vala e të nxehtit 'përvëlon' Francën, temperaturat pranë 40°C

Franca po përballet me një valë të fortë të nxehti veror, ku temperaturat në disa rajone janë ngjitur pranë 40 gradë Celsius, duke ndryshuar ndjeshëm ritmin e jetës së përditshme për banorët dhe turistët.

Në Paris, zonat turistike si Montmartre po përjetojnë fluks të madh vizitorësh që janë detyruar të përshtatin oraret e tyre. Shumë prej tyre kanë zgjedhur të dalin herët në mëngjes, të pajisur me ujë, çadra kundër diellit dhe ventilatorë portativë, për t’u përballur me vapën e fortë që gjatë ditës arrin nivele të larta, deri në rreth 36 gradë Celsius. Radhë të gjata janë krijuar pranë Bazilikës së Sacré-Cœur, ndërsa një pjesë e vizitorëve kërkojnë hije në shkallët e saj për t’u mbrojtur nga dielli përvëlues.

Turistët raportojnë se kanë ndryshuar plotësisht planet e pushimeve, duke i zhvendosur vizitat në orët e para të ditës, ndërsa pasditja po shmanget për shkak të temperaturave të larta dhe kushteve të vështira atmosferike.

Situata e ngjashme është regjistruar edhe në qytete të tjera franceze. Në Tuluzë, autoritetet lokale kanë vendosur struktura të posaçme për krijimin e hijeve në zona të frekuentuara si Place du Capitole dhe Rue d’Alsace-Lorraine. Këto hapësira po shfrytëzohen gjerësisht nga këmbësorët dhe çiklistët, ndërsa parashikimet meteorologjike paralajmërojnë se fundjava mund të sjellë temperatura deri në 39 gradë Celsius.

Autoritetet franceze u kanë bërë thirrje qytetarëve dhe turistëve të tregojnë kujdes maksimal, ndërsa ekspertët e klimës theksojnë se valët e të nxehtit po bëhen gjithnjë e më të shpeshta dhe më të forta në Evropë, duke ndikuar drejtpërdrejt në jetën urbane dhe aktivitetet e përditshme.