FT: Bisedimet SHBA-Iran dështuan për shkak të sulmeve izraelite në Liban

Bisedimet midis Iranit dhe Shteteve të Bashkuara në Zvicër janë shtyrë për shkak të serisë së sulmeve ajrore vdekjeprurëse të Izraelit në Libanin jugor, thanë tre burime të njohura me çështjen.

Burimet thanë se Irani nuk dërgoi një delegacion në Zvicër për bisedime bërthamore për shkak të sulmeve. "Iranianët kanë kërkuar garanci se armiqësitë në Liban do të pushojnë, siç përcaktohet në marrëveshjen e nënshkruar, dhe ndërmjetësit aktualisht po punojnë për të zgjidhur çështjen", tha një diplomat i njohur me çështjen.

Sulmet izraelite në Bejrut kanë kërcënuar vazhdimisht të prishin negociatat midis Shteteve të Bashkuara dhe Iranit, me Presidentin e SHBA-së Donald Trump që shpreh hapur zhgënjimin e tij me këmbënguljen e Izraelit për të vazhduar ofensivën e tij, vëren gazeta Finanacial Times.

Irani ka mbajtur qëndrimin e tij "pa Liban, pa marrëveshje", tha një burim i dytë i njohur me negociatat, duke shtuar se Teherani beson se mund të fitojë epërsi dhe të nxjerrë lëshime nga Uashingtoni në lidhje me luftën e Izraelit kundër Libanit.

Sipas diplomatit të parë, mesazhi i iranianëve ishte: "Ne e kemi frenuar Hezbollahun, Shtetet e Bashkuara nuk mund ta frenojnë Izraelin. Derisa ta bëjnë këtë, ne nuk do të shfaqemi".

Dy nga burimet thanë se bisedimet ishin riplanifikuar paraprakisht për të hënën, por se kjo varej nga situata në Liban. Një burim i tretë tha se kohëzgjatja e shtyrjes mbeti e pakonfirmuar.