Botërori 2026, për herë të parë me 1/16-at e finales: rregullorja për vendet e treta më të mira dhe barazimin në pikë

Meksika është kombëtarja e parë që ka siguruar kalimin në fazën tjetër të Botërorit 2026. Ky edicion hyn në histori si i pari me 48 skuadra pjesëmarrëse, duke shtuar 16 përfaqësuese më shumë krahasuar me formatin e mëparshëm.

Ky zgjerim i madh sjell edhe një risi të rëndësishme: eliminon kalimin e drejtpërdrejtë në 1/8-at e finales dhe shton një raund të ri me eliminim direkt, 1/16-at e finales, të cilat do të nisin më 28 qershor.

Nga 48 skuadra pjesëmarrëse, plot 32 do të kualifikohen në fazën me eliminim direkt, ndërsa vetëm 16 do të eliminohen menjëherë. Në fazën tjetër do të kalojnë:

• 12 fitueset e grupeve (nga Grupi A deri te Grupi L);
• 12 skuadrat e renditura në vendin e dytë;
• 8 vendet e treta më të mira.

Si përcaktohet renditja në rast barazimi në pikë?

Me 12 grupe nga katër skuadra dhe vetëm tri ndeshje për secilën, mundësia e barazimit në pikë është shumë e madhe. Nëse dy ose më shumë skuadra mbyllin grupin me pikë të barabarta, FIFA do të zbatojë këto kritere:

Ndeshjet direkte

A) Numri më i madh i pikëve të fituara në ndeshjet direkte.

B) Diferenca më e mirë e golave në ndeshjet direkte.

C) Numri më i madh i golave të shënuar në ndeshjet direkte.

Kriteret e përgjithshme të grupit

D) Diferenca më e mirë e golave në të gjitha ndeshjet e grupit.

E) Numri më i madh i golave të shënuar në grup.

F) Renditja disiplinore (Fair Play), e llogaritur sipas kartonëve të marrë nga lojtarët dhe stafi.

G) Renditja e FIFA-s, e përdorur si kriteri i fundit për ndarjen e skuadrave.

Si përcaktohen vendet e treta më të mira?

Risia më e madhe e turneut është krahasimi i 12 skuadrave që përfundojnë në vendin e tretë në grupet e tyre. Vetëm tetë prej tyre do të kualifikohen, ndërsa katër do të eliminohen.

Kriteret janë:

• Pikët e fituara në grup;
• Diferenca e përgjithshme e golave;
• Numri i golave të shënuar;
• Renditja disiplinore (më pak kartonë dhe ndëshkime);
• Renditja e FIFA-s, sipas klasifikimit zyrtar të ngrirë më 11 qershor 2026.

Sa pikë nevojiten për kualifikim?

Sipas simulimeve statistikore dhe precedentëve nga turne të ngjashëm:

• 5 pikë – kualifikim i sigurt matematikisht.
• 4 pikë – pothuajse siguri totale për kalimin e grupit.
• 3 pikë – rreth 65% mundësi për t’u kualifikuar si një nga vendet e treta më të mira.
• 2 pikë – vetëm rreth 5% shanse për të kaluar më tej.

Si janë përcaktuar përballjet?

Për shkak të pranisë së vendeve të treta më të mira, mund të krijoheshin deri në 495 kombinime të ndryshme për 1/16-at e finales. Për të shmangur konfuzionin, FIFA ka vendosur një skemë fikse.

Ky sistem garanton që skuadrat e të njëjtit grup të mos përballen menjëherë në fazën me eliminim direkt dhe përcakton paraprakisht çiftet e mundshme të ndeshjeve.

Përballjet e 1/16-ave të finales

Ana e majtë e tabelës

1E – 3A/B/C/D/F

1I – 3C/D/F/G/H

2A – 2B

1F – 2C

2K – 2L

1H – 2J

1D – 3B/E/F/I/J

1G – 3A/E/H/I/J

Ana e djathtë e tabelës

1C – 2F

2E – 2I

1A – 3C/E/F/H/I

1L – 3E/H/I/J/K

1J – 2H

2D – 2G

1B – 3E/F/G/I/J

1K – 3D/E/I/J/L