Shqiptari arratiset nga burgu në Itali, policia e arreston në zonën ku banonte e dashura e tij

LA GAZZETTA DEL MEZZOGIORNO

Një person me origjinë shqiptare është arratisur këtë mëngjes nga burgu i Brindisit në Itali. Kërkimet për të burgosurin nisën në të gjithë provincën.

Lajmi, i bërë publik nga SAPPE, është konfirmuar nga forcat e rendit.

Sipas sindikatës, në momentin e hapjes së oborrit të shëtitjes, i burgosuri ka arritur të kapërcejë murin, ka mbërritur në zonën ndërmjet mureve të sigurisë, është ngjitur në murin rrethues (i cili ishte pa mbikëqyrje) dhe është arratisur.

“Kjo – shpjegon SAPPE – ka qenë e mundur sepse polici në shërbim këtë mëngjes, përveç mbikëqyrjes së oborrit të shëtitjes, ishte i detyruar të menaxhonte disa poste shërbimi njëkohësisht, përfshirë një repart të vogël ku mbahen të burgosur nën mbikëqyrje të lartë”.

Ditët e fundit SAPPE kishte denoncuar “mungesën e rëndë të personelit në burgun e Brindisit, ku 120 policë të parashikuar në organikë (nga të cilët rreth pesëdhjetë merren drejtpërdrejt me të burgosurit) duhet të mbikëqyrin pothuajse 270 persona, në vend të 150 që parashikohen nga kapaciteti i vendeve të disponueshme”.

Për mungesën e personelit, sindikata do të paraqesë një kallëzim pranë autoriteteve gjyqësore.

ARRESTIMI NË LATIANO

I burgosuri me origjinë shqiptare, 23 vjeç, i arratisur këtë mëngjes nga burgu i kryeqendrës së provincës së Brindisit, është lokalizuar në Latiano, në provincën e Brindisit, dhe është arrestuar.

Kërkimet e forcave të rendit vazhduan në një zonë midis Latianos dhe Mesagnes, qytet ku personi banonte përpara arrestimit të tij disa muaj më parë, në zbatim të një urdhri burgimi, pasi duhej të vuante një dënim për vepra penale që lidhen me mbajtjen e lëndëve narkotike me qëllim shpërndarjeje dhe për kundërshtim të zyrtarit publik.

Arratisja e tij u ndërpre nga agjentët e komisariatit të Mesagnes dhe nga policia e burgjeve në Latiano, ku jeton e dashura e tij.

Në kërkime morën pjesë edhe karabinierët.