Rihanna arrin 20 këngë me mbi 1 miliard dëgjime në Spotify

Rihanna ka vendosur zyrtarisht një standard të ri në industrinë muzikore, duke u bërë gruaja e parë me ngjyrë që arrin plot 20 këngë me mbi 1 miliard dëgjime në platformën Spotify.

Sipas listës së publikuar nga Genius, suksesi i saj shtrihet përgjatë dy dekadave karrierë, duke përfshirë hitet solo dhe bashkëpunime që kanë lënë gjurmë të forta në kulturën pop globale.

Në krye të kësaj liste historike qëndron hiti i saj “We Found Love”, i cili kryeson me më shumë se 2.5 miliardë dëgjime. Menjëherë pas tij renditet bashkëpunimi me Calvin Harris, “This Is What You Came For”, me mbi 2.3 miliardë dëgjime, si dhe “Umbrella”, që ka kaluar shifrën prej 2.2 miliardë dëgjimesh.

Baladat e saj ikonike vazhdojnë të dominojnë platformën, ku “Love On The Brain” ka kaluar mbi 2.2 miliardë dëgjime, ndërsa “Stay” dhe “Diamonds” afrojnë secila rreth 1.9 miliardë dëgjime.

Po ashtu, këngët ritmike që kanë pushtuar klubet dhe radiot botërore si “Only Girl (In The World)”, “Don’t Stop The Music”, “S&M” dhe “Work” kanë kaluar secila shifrën e 1.7 miliardë klikimeve.

Lista plotësohet me bashkëpunime të rëndësishme si “The Monster” dhe “Love The Way You Lie” me Eminem, “Wild Thoughts” me DJ Khaled, si dhe “FourFiveSeconds” dhe “Too Good” me Drake.

Ndërkohë, rekordin e kanë përforcuar së fundmi edhe këngë të tjera që kanë kaluar pragun e një miliardi dëgjimesh, mes tyre “Disturbia”, “Pon de Replay” dhe “Bitch Better Have My Money”.

Ky sukses e konsolidon më tej statusin e Rihanna-s si një nga artistet më të dëgjuara dhe më me ndikim në historinë e muzikës moderne.