Goditje për Ganën, Partey humbet apelimin për vizën e Kanadasë

Kombëtarja e Ganës ka marrë një lajm të keq në prag të ndeshjes së saj të parë në Botërorin 2026. Mesfushori ganez, Thomas Partey, ka humbur apelimin në gjykatë kundër vendimit që i ndalon hyrjen në Kanada.

Autoritetet kanadeze i kishin refuzuar më herët vizën futbollistit, i cili aktualisht po përballet me një proces gjyqësor në Britaninë e Madhe. Partey është nën hetim për shtatë akuza për përdhunim, të lidhura me denoncimet e paraqitura nga katër gra të ndryshme për ngjarje që dyshohet se kanë ndodhur mes viteve 2020 dhe 2022. Futbollisti i ka mohuar akuzat dhe çështja vazhdon të shqyrtohet nga drejtësia britanike.

Federata e Futbollit e Ganës dhe përfaqësuesit e lojtarit tentuan të ndryshonin vendimin përmes një apelimi në një gjykatë kanadeze, me shpresën që mesfushori të mund të bashkohej me ekipin për ndeshjen debutuese të Botërorit në Toronto.

Megjithatë, gjykata nuk e pranoi kërkesën, duke lënë në fuqi vendimin e autoriteteve të Otavës. Si pasojë, Partey nuk do të jetë në gjendje të udhëtojë drejt Kanadasë dhe të ndihmojë Ganën në fazën e grupeve të turneut.

Mungesa e një prej lojtarëve më me përvojë të skuadrës përbën një problem të rëndësishëm për përfaqësuesen afrikane, e cila synon të bëjë paraqitje dinjitoze në Botërorin 2026. Ndërkohë, situata e Partey-t mbetet e lidhur me zhvillimet e procesit gjyqësor që po vazhdon në Britaninë e Madhe.