Berisha: Opozita është nën tiraninë mediatike të medieve të kapura, Rama mashtroi hapur me ‘studimin’ e tij

Kryetari i Partisë Demokratike, Sali Berisha faktoi tiraninë mediatike ndaj opozitës shqiptare në Shqipëri me porosi të kryeministrit Edi Rama duke hedhur poshtë mashtrimin e Ramës i cili deklaronte se mediet ishin të kapura nga opozita.

Në një konferencë për median Berisha denoncoi kapjen e medieve nga kryeministri Edi Rama i cili si këmbim i ka dhënë 4500 metra katrorë tokë apo leje të paligjshme ndërtimi.

“Kapja e medieve ka treguesit e vet dhe nuk ka media më të kapura në Evropë se mediat private në Shqipëri, nuk po flas për shtetëroren po e po, të cilat marrin titullin e investitorit strategjik, të cilat marrin dhurata 4500 katrorë tokë në mes të Tiranës, e lënë për gjimnaz. Nuk ka media më të kapura në botë, të cilat ushqehen me leje të paligjshme ndërtimi” tha sot Berisha.

Pjese nga fjala e Berishes

Sot, jam para jush për të faktuar me studime të porositura nga Edi Rama, tiraninë mediatike ndaj opozitës shqiptare në Shqipëri.
Edi Rama para pak kohësh me paturpësi ekstreme, dhe theksoj se kur nuk ke turp, bën çdo gjë dhe thua çdo gjë, u paraqit para shqiptarëve dhe opinionit ndërkombëtar si qeveri e një vendi në të cilin mediet ishin të kapura nga opozita.

Në shkallë ekstreme paturpësie ai u referua një studimi që provon absolutisht të kundërtën në raport me opozitën, provon tiraninë e medieve të kontrolluara nga Rama ndaj opozitës, sipas të cilit mediat në 67 përqind të tyre qenkan për opozitën dhe vetëm në 30 e sa përqind për qeverinë.

Një deklaratë të tillë mund ta bëjë një njeri që ka humbur kontrollin psikik, por jo nga sëmundja, nga transformimi i tij i tmerrshëm psikologjik.
Studimi në fjalë, që i referohet Edi Rama, nuk ka asnjë lidhje absolute me studimin e kapjes së medieve.
Jo dhe jo.

Kapja e medieve ka treguesit e vet dhe nuk ka media më të kapura në Evropë se mediat private në Shqipëri, nuk po flas për shtetëroren po e po, të cilat marrin titullin e investitorit strategjik, të cilat marrin dhurata 4500 katrorë tokë në mes të Tiranës, e lënë për gjimnaz.
Nuk ka media më të kapura në botë, të cilat ushqehen me leje të paligjshme ndërtimi.

Të cilat, siç është faktuar, marrin miliona e miliona euro nga tenderat e rrugëve dhe punëve publike me qëllimin e vetëm të mbrojnë qeverinë dhe të sulmojnë opozitën.

Nuk ka një zyrë tjetër të faktuar, e cila drejton jo vetëm lajmin, por drejton edhe editorialet.
Raportet e pavarura dhe të vërteta që kanë studiuar kapjen e medieve, kanë treguar se ato në 90-93 përqind të tyre në lajme dhe editoriale kontrollohen nga qeveria dhe janë për qeverinë.