Ministri izraelit Ben-Gvir anulon udhëtimin në SHBA për shkak të vështirësive me vizën

Ministri i Sigurisë Kombëtare të Izraelit, Itamar Ben-Gvir ka anuluar një udhëtim të planifikuar familjar në SHBA, mes vështirësive në marrjen e vizës.

Ministri izraelit i ekstremit të djathtë ishte gati të udhëtonte për në Miami për të marrë pjesë në dasmën e vajzës së një biznesmeni izraelit.

 Ben-Gvir kërkoi që biznesmeni ta financonte udhëtimin përpara se të pranonte ta paguante vetë pas kritikave nga kontrollori i shtetit.

Ambasada e SHBA-së i ka thënë Ben-Gvir-it se ai duhet të paraqitet personalisht për të dhënë shenjat biometrike të gishtërinjve, si pjesë e procesit të vizave, raportoi sot e përditshmja izraelite "Haaretz".

Kërkesa u interpretua në raportet e mediave izraelite, si një shenjë ngurrimi për t'i dhënë atij vizën.

Ben-Gvir ka qenë shpesh në kryetitujt e mediave për veprimet e tij provokuese, të cilat kanë nxitur kritika të gjera dhe dënim ndërkombëtar.