Pastrimi i parave/ Raportimi i medieve belge: Emri i Edi Ramës përmendet në dosjen ‘Black Eagle’

Prokuroria e Posaçme ka organizuar një operacion para pak ditësh për të goditur dy grupe të trafikut të drogës që kanë pastruar shuma kolosale në ndërtime të shumta në vendin tonë.

Ky operacion, i mbiquajtur nga mediat si operacioni ‘Black Eagle’, flet edhe për të ashtuquajturin takim i Arubës.

Ditën e sotme, kreu i opozitës, Sali Berisha, deklaroi se prokurori Altin Dumani po fsheh elementë të kësaj dosje për të mbrojtur Edi Ramën.

Berisha tha se në këtë dosje flitet për ‘Ramën e gjatë’, por tha se nuk dihet nëse bëhet fjalë për Edi Ramën apo Olsi Ramën.

Megjithatë Berisha theksoi se në takimin e Arubës ka pasur përfaqësues qeveritarë dhe kjo çështje po mbahet në hije nga Prokuroria e Posaçme.

Në fakt, një proces i rëndësishëm gjyqësor me emrin ‘Black Eagle’ është zhvilluar ndaj trafikantëve shqiptarë në Belgjikë.

Pjesë e këtij procesi ishte edhe Afredo Hamzai, që del i përfshirë edhe në dosjen aktuale të SPAK.

Hamzai është drejtues i një prej dy organizatave të trafikut të drogës.

Por kur ky proces u zhvillua në Belgjikë, dy vjet më parë mediat e njohura të këtij vendi, televizioni RTL dhe portali i madh DH Net theksuan se në dosje përmendet edhe emri i Edi Ramës.

Më poshtë shkrimi i këtyre medieve belge i datës 26 prill 2024.

***

Avokatët Cédric Vergauwen dhe Christophe Van Der Beesen argumentuan para gjykatës penale të Brukselit të premten se klienti i tyre, Arben I., nuk ishte fajtor për ndihmë dhe inkurajim në pastrimin e shumave të mëdha parash nga një operacion trafikimi kokaine.

Dy avokatët penalë pohuan se provat kryesore të fajit të paraqitura nga prokurori rrjedhin nga një çështje italiane "që nuk çoi askund".

Dyzet persona akuzohen në këtë çështje, të njohur si Black Eagle, e cila lidhet me një rrjet ndërkombëtar të trafikimit të drogës.

Vergauwen kritikoi faktin se akuzat e prokurorit kundër Arben I. bazoheshin "në informacione nga çështje të huaja", njëra italiane dhe tjetra spanjolle. Lidhur me çështjen e parë, të zhvilluar në Itali në bashkëpunim me Gjermaninë, e cila synonte ndër të tjera Arben I., "nuk çoi askund", argumentoi avokati.

Për këtë arsye, ai i kërkoi gjykatës të zbatojë parimin e gjykimit të dyfishtë, që do të thotë se askush nuk mund të gjykohet dy herë për të njëjtën vepër penale.

Si alternativë, z. Vergauwen kërkoi që prokurorisë t'i urdhërohet të plotësojë dosjen e çështjes. "Nuk mund të formosh një mendim bazuar në një përmbledhje prej 174 faqesh të dosjes spanjolle të përkthyer dobët", i tha ai gjykatës.

Më 18 prill, prokurorja kërkoi një dënim me 10 vjet burg për Arben I., të cilin ajo e konsideron ndërmjetës midis kushëririt të tij, Alfredo H., njërit prej dy udhëheqësve të dyshuar të organizatës kriminale, dhe atyre të një organizate të ngjashme me seli në Majorka.

Ajo gjithashtu argumentoi se ai veproi si ndërmjetës midis Alfredo H. dhe investitorëve në Shqipëri për pastrim parash, me mbështetjen e politikanëve të rangut të lartë.

Emri i Kryeministrit shqiptar, Edi Rama, përmendet në dosje.