Syri TV/ Familjarët e Makladio Hoxhës kundërshtojnë vendimin e Gjykatës së Fierit: Do ta ankimojmë, kërkojmë drejtësi
Dy ditë pas vendimit të Gjykatës së Fierit për pushimin e çështjes së aksidentit ku humbi jetën 33-vjeçari Makladio Hoxha, familjarët e viktimës kundërshtojnë vendimin dhe kërkojnë drejtësi. Ata paralajmërojnë se do ta ankimojnë çështjen në Gjykatën e Apelit, duke ngritur pretendime për parregullsi gjatë procesit gjyqësor dhe duke hedhur akuza edhe ndaj avokatit që përfaqësonte interesat e tyre. Nga ana tjetër, avokati i familjes i mohon këto pretendime dhe deklaron se hetimi ka provuar se viktima ishte shkaktari i aksidentit.
Nëna e tij, Mimoza Hoxha, dhe bashkëshortja, Daiana Hoxha, shprehen se nuk janë dakord me mënyrën se si është trajtuar çështja dhe se vendimi i dhënë nuk i ka bindur. Sipas tyre, ende ka shumë pikëpyetje që kërkojnë përgjigje dhe për këtë arsye kanë vendosur të ndjekin të gjitha rrugët ligjore për të kërkuar drejtësi.
Familjarët bëjnë me dije se do ta ankimojnë vendimin në Gjykatën e Apelit, duke kërkuar rishqyrtimin e plotë të çështjes.
Bashkëshortja e viktimës, Daiana Hoxha, pretendon se avokati që kishte marrë përsipër mbrojtjen e interesave të familjes fillimisht i kishte siguruar se e drejta ishte në anën e tyre dhe se provat mbështesnin pretendimet e familjarëve. Megjithatë, sipas saj, gjatë procesit gjyqësor situata mori një drejtim krejt tjetër nga ai që u ishte paraqitur në fillim.
Ndërkohë, nëna e viktimës, Mimoza Hoxha, ngre pretendime edhe për mënyrën se si është zhvilluar procesi gjyqësor. Ajo deklaron se gjyqtari që shqyrtoi çështjen kishte lidhje të afërta me njërin prej personave që ndodheshin në automjetin e përfshirë në aksident, duke lënë të kuptohet se kjo mund të ketë ndikuar në vendimmarrje.
Familjarët shkojnë edhe më tej në akuzat e tyre, duke pretenduar se avokati i kontraktuar prej tyre ka bashkëpunuar me palën kundërshtare dhe është paguar nga të dyja palët. Sipas tyre, kjo ka dëmtuar interesat e familjes gjatë procesit gjyqësor.
Daiana Hoxha deklaron se familja nuk do të tërhiqet nga kërkesa për drejtësi dhe se do të ndjekë çdo hap ligjor për të zbardhur plotësisht rrethanat e aksidentit dhe për të kundërshtuar vendimin e gjykatës.
I kontaktuar nga media, avokati Rudin Birçaj ka mohuar kategorikisht akuzat e ngritura ndaj tij. Ai theksoi se hetimi dhe procesi gjyqësor janë zhvilluar normalisht dhe në përputhje me procedurat ligjore.
Sipas Birçajt, provat e administruara gjatë hetimit kanë çuar në përfundimin se viktima ka qenë shkaktari i aksidentit, pasi motoçikleta që drejtonte ka goditur nga pas një automjet.
Aksidenti i rëndë, ku humbi jetën Makladio Hoxha, ndodhi në muajin nëntor të vitit 2025 në aksin rrugor Suk–Strum. Sipas të dhënave të bëra publike në atë kohë, 33-vjeçari po udhëtonte me motoçikletë kur u përfshi në një aksident me një automjet, duke humbur jetën në vendngjarje.
Pas ngjarjes, policia arrestoi dy personat që ndodheshin në automjet, ndërsa hetimet vijuan për të përcaktuar shkaqet dhe përgjegjësitë e aksidentit. Me vendimin e fundit të Gjykatës së Fierit për pushimin e çështjes, familjarët e viktimës kanë vendosur të kërkojnë rihapjen e shqyrtimit të saj në shkallët më të larta të gjyqësorit.