Goditje e rëndë për Evertonin, duhet t’i paguajë klubit të Brojës 35 milionë paundë dëmshpërblim

Evertoni është përballur me një goditje të rëndë financiare, pasi është dënuar të paguajë 35 milionë paundë dëmshpërblim ndaj Burnley-t për shkelje të rregullave financiare të Premier League.

Vendimi lidhet me sezonin 2021-2022, kur Evertoni arriti të mbijetonte në elitën e futbollit anglez pavarësisht penalizimit me 10 pikë, i cili më vonë u reduktua në gjashtë pikë. Burnley, që në atë sezon ra nga kategoria, argumentoi se shkeljet financiare të Evertonit kishin ndikuar drejtpërdrejt në garën për mbijetesë dhe kishin ulur shanset e tij për të qëndruar në Premier League.

Pas një beteje ligjore, Kolegji i Arbitrazhit i Premier League i dha të drejtë Burnley-t, duke vendosur që klubi nga Liverpuli të paguajë 35 milionë paundë si kompensim.

Evertoni, i cili është në pronësi të familjes Friedkin, e njëjta që zotëron edhe Roma, reagoi menjëherë ndaj vendimit dhe njoftoi se do të paraqesë apel.

Në deklaratën zyrtare të klubit, vendimi është cilësuar si “një precedent i rrezikshëm” dhe “plotësisht i gabuar”. Drejtuesit e Evertonit besojnë se arbitrazhi ka bërë një vlerësim të pasaktë të çështjes dhe synojnë ta kundërshtojnë atë në instancat përkatëse.

Rasti pritet të vazhdojë të diskutohet në futbollin anglez, pasi mund të krijojë një precedent të rëndësishëm për klubet që përballen me akuza për shkelje të rregullave financiare. Ndërkohë, Burnley e konsideron vendimin një fitore të rëndësishme në përpjekjet e tij për të kërkuar drejtësi për pasojat që, sipas klubit, erdhën nga shkeljet e rivalit të tij.