Goditet nga një makinë dhe humb jetën një nga historianët më të shquar amerikanë
Historiani dhe autori i njohur amerikan, Gordon S. Wood, fitues i çmimit prestigjioz Pulitzer, ka ndërruar jetë në moshën 93-vjeçare pasi u përplas nga një automjet në një parking supermarketi në Rhode Island.
Sipas Policisë së East Providence, ngjarja ndodhi të dielën, kur Wood po kalonte në parkingun e një supermarketi dhe u godit nga një makinë. Shoferi qëndroi në vendngjarje dhe bashkëpunoi me autoritetet gjatë hetimeve.
Historiani u transportua me urgjencë në Spitalin Rhode Island me plagë të rënda, por nuk arriti t’u mbijetonte dëmtimeve të marra.
Gordon S. Wood konsiderohej një nga studiuesit më të rëndësishëm të historisë amerikane. Ai fitoi çmimin Pulitzer në vitin 1993 në kategorinë e historisë për veprën “The Radicalism of the American Revolution” (“Radikalizmi i Revolucionit Amerikan”), ku argumentonte se shkëputja nga Britania e Madhe ishte jo vetëm një revolucion politik, por edhe një transformim i thellë shoqëror.
Wood mbajti titullin Profesor Alva O. Way University dhe ishte profesor emeritus i historisë në Universitetin Brown. Gjatë karrierës së tij akademike botoi një sërë veprash me ndikim, mes të cilave “The Creation of the American Republic, 1776–1787”, “Empire of Liberty” dhe “Revolutionary Characters”, kushtuar figurave kryesore që formësuan Shtetet e Bashkuara të Amerikës.
Për kontributin e tij në studimet historike, Wood u nderua me një sërë çmimesh prestigjioze, përfshirë Çmimin Bancroft në vitin 1970 dhe Medaljen Kombëtare të Shkencave Humane, të cilën e mori nga ish-presidenti amerikan Barack Obama në Shtëpinë e Bardhë në vitin 2011.
Në vitet e fundit, ai u bë i njohur edhe për kritikat ndaj Projektit 1619 të gazetës New York Times, duke kundërshtuar interpretimin se ruajtja e skllavërisë ishte një ndër motivet kryesore të Revolucionit Amerikan. Wood argumentonte se projekti nxiste një kulturë viktimizimi, megjithëse kishte pranuar se nuk e kishte studiuar plotësisht të gjithë materialin e publikuar.