Christian Eriksen reagon pas kolapsit të ri në fushë: Ishte ndryshe nga 2021
Mesfushori danez, Christian Eriksen, ka reaguar brenda 24 orësh pas momentit të frikshëm që përjetoi gjatë ndeshjes miqësore mes Danimarkës dhe Ukrainës, ku u rrëzua pa ndjenja në fushë në minutën e 66-të. Ky është episodi i dytë i tillë në karrierën e tij, duke rikthyer shqetësim të madh për gjendjen e tij shëndetësore.
Përmes një mesazhi në Instagram, 151-herë përfaqësuesi i Danimarkës siguroi tifozët se gjendja e tij është e qëndrueshme dhe se ndodhet në shtëpi me familjen.
“Dua që të gjithë ta dinë se jam mirë, në shtëpi dhe me familjen time. Siç mund ta imagjinoni, defibrilatori i brendshëm (ICD) pati një ndikim të madh tek unë dhe familja ime, por dua të siguroj se kjo ishte një situatë ndryshe nga ajo që ndodhi në vitin 2021”, shkroi Eriksen.
Mesfushori danez iu referua ngjarjes së rëndë gjatë Euro 2020 (i zhvilluar në 2021), kur pësoi arrest kardiak në ndeshjen ndaj Finlandës dhe për disa minuta u konsiderua klinikisht i vdekur. Falë ndërhyrjes së shpejtë të stafit mjekësor dhe përdorimit të defibrilatorit, ai arriti të mbijetonte dhe më pas iu rikthye futbollit profesional me një pajisje të posaçme në zemër.
Eriksen shtoi se procesi i rikuperimit ka nisur dhe se është mirënjohës për mbështetjen e madhe që ka marrë nga shokët e skuadrës dhe stafi mjekësor.
“Po ndihem mirë dhe kam filluar procesin e rikuperimit. Jam shumë mirënjohës për të gjithë ndihmën që kam marrë ndër vite. Falë tyre, pajisja ime ka bërë saktësisht atë që duhet: të më mbrojë kur ishte e nevojshme”, u shpreh ai.
Edhe pse episodi i fundit nuk ka pasur të njëjtën rëndesë si ai i vitit 2021, situata ka shkaktuar sërish shqetësim të madh, pasi bëhet fjalë për një tjetër kolaps të papritur në fushë.
Në fund të mesazhit të tij, Eriksen theksoi se për momentin fokusi i tij është te shërimi dhe familja: “Tani dua të përqendrohem te rikuperimi, të kaloj kohë me familjen, të shkoj me pushime dhe të luaj futboll me fëmijët e mi”.