Alarm pas kolapsit të dytë të Eriksen: Ka shumë të panjohura për sëmundjet e zemrës te të rinjtë

Kolapsi i dytë i futbollistit danez Christian Eriksen gjatë ndeshjes miqësore ndaj Ukrainës ka rikthyer shqetësimet rreth rreziqeve që paraqesin sëmundjet kardiake tek sportistët e rinj. Mesfushori 34-vjeçar u rrëzua në fushë gjatë takimit, por mjeku i kombëtares daneze, Morten Boesen, konfirmoi se ai rifitoi vetëdijen shumë shpejt dhe gjendja e tij është e qëndrueshme.

Ngjarja rikujtoi incidentin dramatik të Euro 2020, kur Eriksen pësoi arrest kardiak gjatë ndeshjes me Finlandën.

Pas atij episodi, ai iu nënshtrua vendosjes së një defibrilatori të implantueshëm për të vazhduar karrierën sportive.

Pas incidentit të fundit, drejtori ekzekutiv i organizatës “Cardiac Risk in the Young” (CRY), Dr. Steven Cox, theksoi se rasti i Eriksenit është një kujtesë e fortë për rrezikun që paraqesin sëmundjet e padiagnostikuara të zemrës tek të rinjtë.

Sipas tij, çdo javë në Britaninë e Madhe të paktën 12 të rinj, që duken plotësisht të shëndetshëm, humbin jetën papritur për shkak të problemeve kardiake të pazbuluara më parë.

Ai nënvizoi rëndësinë e kontrolleve të rregullta kardiake, si për sportistët elitarë ashtu edhe për popullatën e gjerë.

“Ne kemi mësuar shumë gjatë 30 viteve të fundit, por ende ka shumë të panjohura. Në rreth 80 për qind të rasteve nuk ka asnjë simptomë para kolapsit”, deklaroi Cox, duke bërë thirrje për më shumë investime në kërkime shkencore dhe programe depistimi.

Ekspertët theksojnë se sporti nuk shkakton vdekjen e papritur kardiake, por mund të rrisë ndjeshëm rrezikun tek personat që kanë probleme të fshehura me zemrën.

Për këtë arsye, rasti i Eriksenit ka hapur sërish debatin mbi nevojën për kontrolle më të shpeshta dhe më të detajuara për sportistët profesionistë.