Personazhi televiziv ‘anti-woke’ trondit garën për kryetar bashkie në Los Anxheles

Ylli i The Hills e paraqet veten si një “Batman” që lufton krimin në fushatën e tij zgjedhore

Një ish-personazh televiziv amerikan, i cili e paraqet veten si një “Batman” kundër kulturës woke, do të sfidojë kryetaren e bashkisë së Los Anxhelesit pas një fushate të suksesshme zgjedhore.

Spencer Pratt, një republikan 42-vjeçar që u bë i famshëm si personazhi negativ i emisionit The Hills në MTV, renditej i dyti në numërimin e hershëm të zgjedhjeve paraprake të qytetit.

Me 60 për qind të votave të numëruara deri të mërkurën në mbrëmje, ai kishte 30 për qind të votave, vetëm pesë pikë pas Karen Bassit, kryetares aktuale demokrate. Nëse e ruan këtë pozicion kur të numërohen votat përfundimtare, ai do të përballet me të në balotazhin e nëntorit.

Ish-publicisti dhe ish-konkurrenti i Celebrity Big Brother premtoi një qasje agresive për të larguar të pastrehët nga qyteti, duke thënë se ata ishin sjellë aty nga “qendra mashtruese rehabilitimi, OJQ mashtruese dhe organizata mashtruese për të pastrehët”.

Bass u tha mbështetësve të saj:“Ia kam kushtuar gjithë jetën time shërbimit ndaj qytetit që dua, ku kam lindur, dhe do të vazhdoj ta bëj këtë deri në fitoren e nëntorit.”

Fushata e tij, e cila mori mbështetjen e Donald Trump-it, nisi pasi shtëpia e tij u shkatërrua nga zjarret në Pacific Palisades. Pratt fitoi një ndjekje të madhe në rrjetet sociale duke dënuar reagimin e autoriteteve të qytetit ndaj katastrofës.

Ai përdori inteligjencën artificiale për një reklamë elektorale ku shfaqej i veshur si Batman, duke rikthyer drejtësinë në një qytet të pushtuar nga krimi dhe i qeverisur nga elita të majta të shkëputura nga realiteti.

Fushata e Pratt-it shfrytëzoi zemërimin e përhapur për procesin e ngadaltë të rindërtimit pas zjarreve dhe për problemin kronik të të pastrehëve të varur nga droga në Los Anxheles.

Ryan, 46 vjeç, pronar i një picerie, është gjithashtu i dëshpëruar për një ndryshim të udhëheqjes së qytetit dhe beson se Pratt mund të jetë përgjigjja.

“Nuk i besoj gjithçkaje që shoh në rrjetet e tij sociale, por ai thotë se dëshiron ndryshim dhe ne kemi nevojë për këtë,” tha ai.

Banorë të tjerë janë të shqetësuar nga mungesa e qartë e përvojës politike dhe karriera e tij televizive.

Brian, 36 vjeç, estetist, i cili është rritur duke parë Pratt-in në The Hills, tha:“Pse do të doja që ai njeri të bëhej kryetar bashkie? Nuk dua një tjetër yll realityshow, si Trump, që kërkon vëmendje dhe pushtet.”

Pratt u distancua nga mbështetja e Trump-it, duke e ditur se përkrahja e presidentit mund ta dëmtonte më vonë fushatën e tij për postin jopartiak të kryetarit të bashkisë në një bastion demokrat.

Andrew Acosta, strateg politik me dy dekada përvojë në menaxhimin e fushatave në Kaliforni, tha se Pratt veproi me mençuri duke shmangur çështjet kombëtare dhe duke u përqendruar te pakënaqësitë ndaj qeverisjes së Bass-it.

“Votuesit e qytetit nuk i besojnë Bass-it kur ajo thotë se krimi dhe numri i të pastrehëve janë ulur, sepse realiteti që shohin përpara tyre duket ndryshe,” tha ai. “Zgjidhjet që propozon Pratt tingëllojnë interesante, por a do të besojnë votuesit se planet e tij janë realiste ose të zbatueshme?”

Rritja e papritur e republikanëve në një qytet thellësisht liberal u pasqyrua edhe nga suksesi i hershëm, ende i kthyeshëm, i Steve Hilton-it, kandidatit republikan në garën për guvernator të Kalifornisë.

Hilton, ish-këshilltar i Lord Cameron-it, e përshkroi veten dhe Pratt-in si “dy njerëz nga jashtë sistemit që nuk kanë kandiduar kurrë më parë për poste publike”, por që po sfidojnë një sistem të dështuar.

Votat e hershme zakonisht favorizojnë republikanët në sistemin e ngadaltë zgjedhor të Kalifornisë. Votat e vona, të cilat priren drejt demokratëve, do të vazhdojnë të numërohen gjatë ditëve, në mos javëve, në vijim.

Tom Steyer, miliarderi progresist, renditej i treti. Rreth 40 për qind e votave mbeten ende pa u numëruar në garën për guvernator, kështu që Becerra dhe Steyer mund ta lënë ende Hilton-in jashtë balotazhit të nëntorit.

Me 40 për qind të votave ende të panumëruara edhe në garën për kryetarin e bashkisë së LosAnxhelesit, Pratt mund të kalohet ende nga Nithya Raman, një demokrate progresiste në këshillin e qytetit, e cila aktualisht ka 22 për qind të votave.

Ai ka 30 për qind të votave, përpara Raman-it me 22 për qind dhe pas Bass-it me 35 për qind.

Rezultatet e hershme treguan se “Zoti donte të më jepte edhe pesë muaj të tjerë për të nxjerrë në pah të gjitha dështimet e kryetares sonë të bashkisë”, tha Pratt.

Gjashtë shtete zhvilluan zgjedhje paraprake të martën, ku votuesit zgjodhën kandidatët për zgjedhjet e ndërmjetme të nëntorit. Vëmendja më e madhe u përqendrua te Kalifornia dhe Iowa, të cilat të dyja zhvilluan gara konkurruese për postin e guvernatorit.

Trump pati një pengesë të rrallë në garën paraprake republikane për guvernator të Iowa-s, pasi kandidati që ai mbështeti humbi votimin.

Miratimi i presidentit ka ndihmuar një numër të madh kandidatësh gjatë muajit të fundit, duke larguar republikanë të njohur që ai i konsideronte jo mjaftueshëm besnikë.

Por në Iowa, mbështetja e vonshme e Trump-it për RandyFeenstra-n nuk mjaftoi për të mposhtur ZachLahn-in, një fermer që kandidoi si konservator jashtë establishmentit politik.

Në një shenjë të rritjes së ndikimit të saj, Lahn mori mbështetjen zyrtare nga Make America Healthy Again, grupi i fushatës i përqendruar rreth Robert F. Kennedy-t, sekretarit të Shëndetësisë.

Në Kaliforni, Hilton zhvilloi fushatë me premtimin për të ulur burokracinë dhe taksat, të cilat sipas tij po dëmtojnë ekonominë dhe banorët e shtetit.

Ai iu referua Arnold Schwarzenegger-it, guvernatorit të fundit republikan të shtetit, në një fjalim para mbështetësve të martën në mbrëmje.

“E di që disa prej jush po mendojnë: ‘Kush është ky tip me theks të çuditshëm që mendon se mund të bëhet guvernator?’”, tha Hilton.

Ish-prezantuesi i Fox News mori mbështetjen e Trump-it dhe të JD Vance-it, zëvendëspresidentit, para votimit. Ai i bëri thirrje Chad Bianco-s, një tjetër kandidati republikan, të tërhiqej nga gara në mënyrë që ai të kishte më shumë mundësi për të hyrë në balotazhin me dy kandidatë kundër demokratëve Becerra dhe Steyer.

Si Pratt ashtu edhe Hilton do të përballen me një sfidë të vështirë nëse arrijnë të hyjnë në zgjedhjet përfundimtare. Kalifornia është një bastion i fortë demokrat, ku partia gëzon një avantazh prej rreth 4.6 milionë votuesish. Qarku i LosAnxhelesit votoi me 65 për qind për Kamala Harris-in në zgjedhjet e vitit 2024.

Sondazhet tregojnë se Pratt do të humbiste me më shumë se 10 pikë diferencë në një balotazh kundër cilësdo prej kandidateve demokrate, Bass ose Raman.

Megjithatë, suksesi i hershëm i kandidatëve republikanë jashtë establishmentit politik tregon se po rritet shqetësimi i votuesve për drejtimin që po merr shteti dhe qyteti i tij më i madh. /Telegraph – Syri.net