Aktori James Handy vritet me thikë, arrestohet djali i partneres së tij

Aktori amerikan, James Handy, i njohur për rolet e tij në filma dhe seriale televizive, ka ndërruar jetë në moshën 81-vjeçare pasi u sulmua me thikë në Los Anxhelos. Autoritetet kanë arrestuar si të dyshuar kryesor djalin e partneres së tij.

Sipas Departamentit të Policisë së Los Anxhelosit, autoritetet morën një telefonatë ku një person deklaronte: “Jam djali i burrit, sapo vrava njeriun e mëkatit”.

Kur policia mbërriti në banesë, gjeti aktorin në oborrin e shtëpisë, pa ndjenja dhe me një plagë thike në gjoks. Handy u transportua menjëherë në spital, por mjekët konfirmuan vdekjen e tij pak më vonë.

I dyshuari është identifikuar si Michael Gledhill, 44 vjeç, djali i partneres së aktorit. Ai jetonte në të njëjtën shtëpi me nënën dhe James Handy-n. Sipas policisë, Gledhill u ka pranuar oficerëve se ishte personi që kërkonin. Ai është arrestuar nën dyshimin për vrasje.

I lindur në Nju Jork, James Handy kishte një karrierë të gjatë në kinematografi dhe televizion. Ai u bë i njohur për rolin e tij si eksterminator në filmin “Jumanji” të vitit 1995, ndërsa së fundmi interpretoi personazhin Jimmy në filmin “Top Gun: Maverick” të vitit 2022.

Karriera e tij përfshinte gjithashtu role në seriale të njohura kriminalistike si “NCIS: Los Angeles”, “The Closer” dhe “Cold Case”.