Ekipet e shpëtimit në Laos po përpiqen të arrijnë te shtatë persona të bllokuar në një shpellë

Ekipet e shpëtimit po përpiqen ende të arrijnë shtatë persona që kanë mbetur të bllokuar në një shpellë në Laos që nga java e kaluar. Një grup fshatarësh në provincën Saisombun hynë në shpellë për të kërkuar ar më 19 maj, por shirat e rrëmbyeshëm shkaktuan përmbytje që bllokuan daljen, thanë ekipet e shpëtimit të përfshira në operacion.

Një zyrtar lokal i tha sot AP-së se një nga personat në grup iku përpara se dalja të bllokohej dhe njoftoi autoritetet. Gjendja e shtatë personave të kapur është e panjohur.

Ai tha se shpella është e ngushtë dhe frekuentohet nga fshatarët që kërkojnë depozita ari. Ai tha se autoritetet i kanë paralajmëruar vazhdimisht njerëzit të mos hyjnë në shpellë për arsye sigurie.Shpëtuesit nga Tajlanda erdhën gjithashtu për të ndihmuar. Zhytësit që atëherë kanë filluar të lëvizin nëpër pjesët e përmbytura të shpellës drejt zonës ku besojnë se grupi mund të jetë i bllokuar.

Ministria e Punëve të Jashtme e Laosit nuk pranoi të komentojë mbi situatën.

Ky vend i Azisë Juglindore është një shtet komunist me një parti pa opozitë të organizuar dhe qeveria e mban informacionin nën kontroll.