Berisha: E shtuna ishte një ditë e historisë. Kam marrë urime nga miqtë e mi dhe pres urime

Gjatë një komunikimi me gazetarët, kreu i Partisë Demokratike, Sali Berisha, e cilësoi të shtunën si një ditë të rëndësishme për demokracinë në Shqipëri dhe për procesin politik brenda opozitës.

I pyetur mbi mungesën e urimeve nga krerët e partive simotra pas rikonfirmimit të tij në krye të PD-së, Berisha u shpreh se ka marrë urime nga miq dhe bashkëpunëtorë, ndërsa theksoi se pret edhe të tjera.

Ai shtoi se kjo situatë lidhet edhe me një lloj reciprociteti në marrëdhëniet politike dhe personale, duke nënvizuar se nuk i kushton rëndësi të veçantë këtij fakti.

Daniela Maloku, ReportTv: Dhe meqë jemi te marrëdhëniet me fqinjët, ndiheni i keqardhur zoti Berisha që pasi u rikonfirmuat në krye të Partisë Demokratike të shtunën nuk patët asnjë mesazh publik nga krerët e partive simotra për t'ju uruar për mandatin e radhës në krye të Partisë Demokratike?  

Sali Berisha:

Mendoj se e shtuna ishte një nga ditët më të ndritshme të demokracisë në Shqipëri që ka mbetur vetëm në opozitë. 
Unë të shtunën kam një mirënjohje të pafund për të gjithë ata të cilët iu përgjigjën pas një propagande agresive të pafund të mafies shtetërore, pas përpjekjes për filtrim të eksponentëve të botës së krimit nga Edi Rama, pas përpjekjeve për t'u përballur në këtë garë me të përdalë politikë të cilët pasi kanë ikur nga PD-ja kanë krijuar parti të tjera dhe kërkojnë të sjellin Edi Ramën. 
Pra, ajo ka qenë ditë e historisë. 
Tani përsa i përket urimeve, kam marrë urime nga miqtë e mi, pres urime, por të jemi të sinqertë, nuk mund të them se unë jam nga ata që çoj shumë urime, kështu që në këtë rast ka një lloj reciprociteti.