Mijëra njerëz protestojnë në Republikën Çeke në mbrojtje të pavarësisë së medias publike

Mijëra njerëz dolën në rrugë në disa qytete anembanë Republikës Çeke të dielën për të demonstruar në mbështetje të pavarësisë së radios dhe televizionit publik, duke protestuar kundër planeve të qeverisë populiste të krahut të djathtë të kryeministrit Andrej Babiš.

Koalicioni trepartiak synon të heqë tarifat e licencave të radios dhe televizionit, dhe në vend të kësaj t’i bëjë Televizionin Çek (ČT) dhe Radion Çeke (ČRo) të varura nga financimi i drejtpërdrejtë shtetëror në të ardhmen. Kritikët paralajmërojnë se kjo mund të minojë pavarësinë e transmetuesve dhe t’i hapë derën ndikimit politik.

Protestat në 12 nga qytetet më të mëdha të vendit u organizuan nga lëvizja qytetare “Një Milion Momente për Demokracinë”, e cila kohët e fundit organizoi një demonstratë të ngjashme në kryeqytetin Pragë.

Organizatorët dhe pjesëmarrësit i drejtuan kritikat e tyre ndaj një projektligji që parashikon që transmetuesit të financohen drejtpërdrejt nga buxheti i shtetit nga viti 2027, me fonde dukshëm më të pakta se sa aktualisht.

Imazhet nga agjencia e lajmeve CTK treguan demonstruesit e mbledhur jashtë një ndërtese transmetimi në Brno, duke valëvitur flamuj çek. Në pankarta shkruhej “Liri për median!” dhe, duke iu drejtuar gazetarëve të televizionit dhe radios, “Ne jemi me ju!” 

Stafi i transmetimit u përgjigj duke shpalosur një banderolë nga dritarja e një studioje ku shkruhej: “Faleminderit!”

Që nga dhjetori, Republika Çeke është qeverisur nga një koalicion i përbërë nga partia populiste e krahut të djathtë ANO e Babiš, partia e ekstremit të djathtë Liri dhe Demokraci e Drejtpërdrejtë (SPD) dhe partia e Shoferëve./ DPA News.