Pse kastorët ndërtojnë diga?

Të njohur për bishtin e tyre të sheshtë dhe aftësinë për të prerë pemë me dhëmbë, kastorët konsiderohen arkitektët e natyrës. Shumica e njerëzve dinë se ata ndërtojnë diga, por jo gjithmonë arsyen pse.

Kastorët ndërtojnë diga për të krijuar një zonë të sigurt, të mbrojtur nga grabitqarët. Megjithatë, ndryshe nga sa besohet shpesh, ata nuk jetojnë brenda digave. Digat janë thjesht një mënyrë për të krijuar një habitat ideal. Duke ngadalësuar rrjedhën e ujit, kastorët krijojnë pellgje të thella ku mund të fshihen dhe të jetojnë më të sigurt.

Në botë ekzistojnë dy lloje kastorësh: kastori i Amerikës së Veriut dhe kastori euroaziatik. Ata ushqehen me bimë, degë të buta, gjethe dhe bimë ujore. Degët e shelgut dhe plepit janë të preferuarat e tyre.

Këto kafshë kanë ndikim të madh në natyrë. Shkencëtarët i quajnë “inxhinierë të ekosistemit”, sepse ndryshojnë mjedisin dhe krijojnë habitate për shumë specie të tjera. Digat e kastorëve ndihmojnë në përmirësimin e cilësisë së ujit, uljen e temperaturës së lumenjve dhe rritjen e biodiversitetit. Studime të ndryshme kanë treguar se ato ndihmojnë edhe peshq si salmoni dhe trofta, të cilët kanë nevojë për ujë të ftohtë për të mbijetuar. / Earth – Syri.net