Akuza për narko-terrorizëm/ ‘Maduro është në një qeli me 18 persona të tjerë’

BILD

Nicolás Maduro, ish-udhëheqësi i Venezuelës, vazhdon të mbahet në burg në SHBA — dhe mesa duket në kushte të vështira. Djali i tij, Nicolás Maduro Guerra, 35 vjeç, zbulon tani se ish-presidenti ndan një qeli burgu në Nju Jork me 18 të burgosur të tjerë, mes tyre edhe një muzikant i njohur amerikan.

Në fillim të janarit, trupat amerikane me urdhër të Presidentit Donald Trump arrestuan Maduron dhe bashkëshorten e tij, Cilia Flores në kryeqytetin Karakas dhe i transportuan në Nju Jork. Atje ata duhet të përballen, ndër të tjera, me akuza për “narko-terrorizëm”.

Sipas “Nicolasito”-s, siç quhet djali i tij, një nga shokët e qelisë së Maduros ka qenë përkohësisht edhe reperi amerikan Tekashi 6ix9ine. Muzikanti, i njohur për tatuazhet e shumta në fytyrë dhe precedentët penalë, vuante një dënim për shkelje të kushteve të lirimit me kusht.

Akuza pretendon se Maduro përdori postin e tij për të lehtësuar kontrabandën e mijëra tonëve kokainë drejt SHBA-së. Ish-presidenti i mohon me forcë këto akuza. Edhe djali i tij e mbrojti në një intervistë për “Der Spiegel”: “Familja ime nuk ka asnjë lidhje me drogën apo terroristët. E gjithë kjo është një proces politik.”

Operacioni ushtarak i 3 janarit e kapi familjen Maduro krejtësisht në befasi. Pavarësisht tensioneve në rritje me administratën Trump, askush nuk e kishte pritur një gjë të tillë. “Nuk prisnim që ata të sulmonin Karakasin”, tha më tej “Nicolasito”. Megjithatë, ai pranoi se Venezuela kishte mbivlerësuar forcat e veta dhe nuk kishte bërë mjaftueshëm për të mbrojtur të atin.

Trump ka pretenduar se pas arrestimit të Maduros, SHBA praktikisht ka marrë kontrollin e qeverisjes së Venezuelës. Edhe këtë version djali i Maduros e kundërshton. “Gjithçka që po ndodh tani është iniciativa jonë: ligji i amnistisë, hapja e sektorit të naftës”, pretendon Maduro Jr.

Aktualisht, ish-zëvendëspresidentja Delcy Rodríguez drejton punët e qeverisë në Karakas.