Vangjeli: Drejtësia në Shqipëri funksionon me dy standarde, Meta në burg, ‘AKSHI’ zvarritet
I ftuar në emisionin "ÇIM PEKA LIVE", analisti Lorenc Vangjeli u shpreh se sistemi i drejtësisë në Shqipëri funksionon me dy standarde.
Ai vuri në dukje kontrastin mes qëndrimit të zgjatur në arrest të ish-presidentit Ilir Meta dhe trajtimit të zvarritur të dosjes “AKSHI”, ku implikohen familjarë të kryeministrit Edi Rama.
Vangjeli theksoi se prokuroria dhe gjykata japin vendime të ndryshme për të njëjtat vepra penale, duke nënvizuar se drejtësia përdoret për të goditur kundërshtarët politikë, gjë që cenon rëndë parimin e barazisë përpara ligjit.
Pjesë nga deklarata:
Të dëgjova me shumë vëmendje në prezantimin tënd dhe ndaj të njëjtin opinion me ty për prezantimin e fakteve, i fotografon siç duhet, por ndahem me ty në mënyrën se si e ngre gjykimin mbi to. Bindja se Edi Rama, po flasim drejtpërdrejt me emra, kontrollon sistemin e drejtësisë, është pjesërisht e drejtë dhe pjesërisht e gabuar, sepse më e sakta është që Edi Rama, si të gjithë kryeministrat e këtij vendi, si të gjithë shefat e ekzekutivit, ka ndikim domethënës në sistemin e drejtësisë.
Kurse unë nuk shikoj një lidhje ndërmjet Edi Ramës dhe vendimit të Gjykatës së Lartë. Atëherë po të them prapavijën se si ka arritur ky vendim. Deri në ditën që u mor ky vendim ka të paktën tre vjet që diskutohet atje. Do të duhej të ishte kolegji penal i Gjykatës së Lartë që ta merrte këtë iniciativë. I është kërkuar në mënyrë të shprehur nga Gjykata e Strasburgut në një seminar që gjithë trupa e Gjykatës së Lartë ka bërë atje, për të bërë këtë ndërhyrje, pra saktësimin e vendimit.
Tani më lejo të bëj një ndërhyrje. Nga momenti që fillojmë dhe u vëmë emra të përveçëm dhe ngjarjeve të caktuara që tentojmë t'i shqyrtojmë. Ka marrë 800 tendera. Kam përshtypjen se gabojmë kur i veshim. Kur i veshim me emra të përvetshëm dhe ngjarje të caktuara, atëherë fillojnë dhe ngatërrohen historitë sepse na ngatërron portretet e tyre.
Ajo që është e drejtpërdrejtë dhe e pamohueshme ka të bëjë pikërisht me atë që ceke gjithashtu. Ke standarde të ndryshme për të njëjtin parim. Pra, në rastin e dy dosjeve, vendimi i gjykatës, vendimi unifikues i Gjykatës së Lartë, në një rast u interpretua në një mënyrë, në rastin tjetër u interpretua ndryshe. Këtu dalim tek një nga plagët më të rënda të sistemit të drejtësisë, që janë standardet e dyfishta. Një standard i vetëm duhet të jetë. Ne standarde të dyfishta kemi pasur në veting. Kanë hequr gjykatës apo prokurorë për një shtesë banese të kohës së Enver Hoxhës dhe kanë mbajtur në detyrë të tjerë që nuk justifikonin qindra milionë lekë.
E njëjta histori sot e verifikuar, prokurorë të ndryshëm mbajnë qëndrime të ndryshme për të njëjtën vepër penale, për të njëjtën çështje penale. Po të njëjtën gjë bëjnë edhe gjykatësit. Kjo është këmbana e madhe e alarmit.
Dhe tani, mbi këtë bazë, nëse i vëmë fytyra kësaj gjëje që po flasim në parim, është: po, Ilir Meta mbahet ende në mënyrë kriminale, në mënyrë joproporcionale, pa logjikë, në një masë të tejzgjatur arresti në burg. Duhej të ishte në krye të herës, jo brenda qelisë, dhe tani po shkon gati 20 muaj aty brenda.
Madje, rëndësia e veprave penale për të cilat akuzohen, krahasimi që bëre me Akshin dhe atë që akuzohet ish-presidenti, nuk kanë të krahasuar. Pjesëmarrja në grupin e strukturuar kriminal ka dy faza. Krijimi dhe drejtimi shkon nga tre deri në tetë vjet burg. Pjesëmarrja, vetëm pjesëmarrja, është nga dy deri në tre vjet burg. Sikur vetëm kjo të ishte, dukshëm sipas Kodit Penal, vepra e parë është shumë më e rëndë se e dyta.
Aq më tepër, dhe ky është një detaj tjetër shumë domethënës, nëse në çështjen e parë jemi në fazën e hetimit, në rastin e dytë hetimi ka përfunduar dhe tani jemi në momentin e hetimit gjyqësor. Pra, nëse do të kishte shanse, shanset do të kishte që të ndodhej në liri ish-presidenti Meta.