Drejtësia e re amniston ish-kryeprokurorin e ‘Toyota Yaris’
Gjykata e Posaçme e Apelit ka liruar nga qelia ish-kryeprokurorin e Vlorës Aurel Zarka që u dënua me 2 vite e 8 muaj burg për korrupsion dhe ushtrim të ndikimit të paligjshëm në kuadër të dosjes “Toyota Yaris”. Vendimi vjen pasi ende çështja gjyqësore ndaj tij nuk ka marrë zgjidhje të plotë teksa është ezauruar koha e vuajtjes së dënimit me kohën e paraburgimit dhe mbajtjes në burg. Kujtojmë se Shkalla e Parë e dënoi për dy veprat e mësipërme me 4 vite heqje lirie që për shkak të gjykimit të shkurtuar i zbriti në 2 vite e 8 muaj, por që Apeli e prishi vendimin duke e kthyer për rigjykim në të njëjtën gjykatës.
Sipas Apelit, prokurorët e çështjes dhe gjyqtarët e seancës paraprake kishin gabuar kur e kishin përcaktuar bashkëpunimin e Zarkës me të pandehurit e tjerë si rrethanë rënduese dhe jo si bashkëpunim në kuadër të një grupi të strukturuar kriminal. Kundër këtij vendimi SPAK dhe vetë mbrojtja e Zarkës bënë rekurs në Gjykatën e Lartë, duke argumentuar se nuk mund të rëndohej pozita e të pandehurit kur ishte ai ankuesi i vetëm.
Gjykata e Lartë e prishi vendimin e Apelit të Posaçëm Anti Korrupsion me arsyetimin se procedura e gjykimit të shkurtuar nuk lejonte shtimin e një akuze të re siç është ajo e kryerjes së veprës penale në kuadër të grupit kriminal. Kolegji Penal i Gjykatës së Lartë i cilëson konkluzionet e Apelit të në interpretim të gabuar të ligjit, duke sjellë si pasojë prishjen e vendimmarrjes dhe kthimin e çështjes për rigjykim po në Apel, me një tjetër trup gjykues. Sipas arsyetimit që dhanë treshja gjykuese, është e pamundur për t’u realizuar si pasojë e zhvillimit të gjykimit të shkurtuar, ku janë pranuar aktet e hetimeve paraprake në gjendjen e tyre dhe se kjo rrethanë përjashton mundësinë e prokurorit për të komunikuar akuza të reja.
Ish-prokurori Zarka, ish-oficerja e Policisë Gjyqësore, Eriona Daupaj, Avokati Radovan Çela dhe biznesmeni Astrit Vladi, vëllai i një prej të pandehurve në çështjen “Toyota Auris”, akuzohen se kanë ushtruar ndikim të paligjshëm në tetë çështje penale që po hetoheshin në katër prokurori të ndryshme, dosje që lidhen kryesisht me aktivitete të krimit të organizuar si pastrimi i parave apo kultivimi i narkotikëve.
Çështja në fjalë u regjistrua pas bllokimit në portin e Durrësit, në qershor të vitit 2018, të 3.4 milionë eurove ‘cash’ të fshehura në dy makina të përdorura dhe të importuara nga Belgjika. Në lidhje me ngjarjen, u arrestuan fillimisht Klevi Çani, Edi Lika dhe Alban Mollaymeri, ndërsa u akuzuan kushërinjtë Elvis Vladi dhe Alfred Vladi. Gjashtë vjet më vonë, në vitin 2024, si rrjedhojë e të dhënave të përftuara nga aplikacioni Sky Ecc, SPAK arrestoi prokurorin e Vlorës Aurel Zarka, avokatin Radovan Çela, Astrit Vladin, vëllain e Elvis Vladit , dhe shpalli në kërkim hetuesen e Byrosë Kombëtare të Hetimit, Eriona Daupaj./Nga Fatjon Gjinaj-SYRI TV