Arrestohet një tifoz për abuzim racist ndaj sulmuesit te Manchester City-t

Një incident i rëndë ka ndodhur gjatë ndeshjes së së hënës mes Evertonit dhe Manchester City-t, e cila përfundoi me rezultatin 3-3, ku një tifoz është arrestuar për abuzime raciste ndaj futbollistit Antoine Semenyo.

Klubi i Evertonit ka konfirmuar se Policia e Merseyside kanë ndërhyrë menjëherë pas raportimeve nga tifozët dhe stjuardët, duke identifikuar dhe arrestuar një burrë 71-vjeçar nën dyshimin për shkelje të rendit publik me motive racore.

Pas ndalimit, i dyshuari është liruar me kusht, por ndaj tij janë vendosur masa të rrepta kufizuese. Ai nuk lejohet të afrohet brenda një distance prej një milje nga stadiumet sportive, duke filluar katër orë para ndeshjeve, gjatë zhvillimit të tyre dhe deri katër orë pas përfundimit.

Në reagimin zyrtar, Evertoni dënoi ashpër çdo formë racizmi dhe diskriminimi, duke theksuar se sjellje të tilla janë të papranueshme në sport dhe në shoqëri. Klubi vlerësoi gjithashtu reagimin e shpejtë të tifozëve të tjerë, stjuardëve dhe policisë, që bëri të mundur identifikimin e menjëhershëm të autorit.

“Racizmi nuk ka vend në stadiumet tona dhe as në futboll. Do të vazhdojmë të bashkëpunojmë ngushtë me autoritetet dhe do të marrim masat më të forta të mundshme në përputhje me politikën tonë të tolerancës zero”, thuhet në deklaratën e klubit.

Ngjarja rikthen edhe një herë në vëmendje nevojën për luftë të vazhdueshme kundër racizmit në sport.