VIDEO/ E turpshme në Angli, disa tifozë të Manchester United provokojnë me këngë për Diogo Jota-n

Një grup i vogël tifozësh të Manchester United është filmuar duke bërë sjellje fyese ndaj kujtimit të Diogo Jota, duke kënduar një këngë provokuese që i referohej vdekjes së tij tragjike në një aksident automobilistik së bashku me vëllanë e tij André.

Ngjarja ka ndodhur të dielën, në prag të derbit të Premier League mes Manchester United dhe Liverpoolit, ndeshje që përfundoi me fitoren 3-2 të “djajve të kuq”. Pamjet e publikuara në rrjetet sociale tregojnë një grup tifozësh duke kënduar “Jota’s gone, bye-bye”, një thirrje që ka shkaktuar reagime të ashpra në opinionin publik.

Ky veprim bie ndesh me atmosferën e përgjithshme të stadiumit “Old Trafford”, ku shumica e tifozëve dhe klubi kishin organizuar një moment homazhi për lojtarin portugez. Në minutën e 20-të të çdo ndeshjeje, në nder të numrit të fanellës së tij, tifozët e Liverpool-it dhe shumë të pranishëm në stadium kanë zhvilluar tribute për Jota-n, duke e kujtuar me respekt.

Incidenti ka shkaktuar zemërim të gjerë, veçanërisht pasi kujtohet edhe një gjest i ngjashëm solidariteti nga tifozët e Liverpool-it në vitin 2022, kur ata nderuan Cristiano Ronaldon pas një tragjedie familjare, duke kënduar “You’ll Never Walk Alone” në shenjë mbështetjeje.

Autoritetet dhe klubet pritet të reagojnë ndaj këtij rasti, ndërsa shumica e opinionit sportiv e ka dënuar sjelljen si të papranueshme dhe në kundërshtim me vlerat e futbollit.

🚨🗣️ Some Manchester United fans’ chants yesterday:

“Jota’s gone, bye-bye.” 🎶🚮pic.twitter.com/HcCuFicP9C

— Goals Side (@goalsside) May 4, 2026