Dua Lipa ndihmon batalionin ukrainas me një kamionçinë

Dua Lipa ka ndihmuar për të dërguar një kamionçinë në Ukrainë për mjekët që ndodhen në vijën e parë të frontit kundër Rusisë.

Këngëtarja shqiptare me banim në Londër organizoi një event për mbledhje fondesh për Driving Ukraine, një organizatë që dërgon automjete evakuimi në vendin e prekur nga lufta.

Edhe nëna e saj ishte pjesë e kolonës humanitare drejt Ukrainës, e cila dorëzoi automjetin tek një batalion mjekësor për t’u përdorur në “misione që shpëtojnë jetë”.

“Probabiliteti që Dua Lipa të ndihmojë në mbledhjen e fondeve për të siguruar një automjet për njësinë tonë nuk është i madh… por nuk është kurrë zero,” shkroi në Instagram Batalioni i Parë i Veçantë Mjekësor i Ukrainës.

“Faleminderit Dua Lipës, Service95 dhe Driving Ukraine për këtë kamionçinë të fuqishme për Batalionin e Parë të Veçantë Mjekësor,” shtoi batalioni. “Ajo do të na ndihmojë të kryejmë misione që shpëtojnë jetë në zonën e luftës.”

Postimi u shoqërua me një video ku një mjek ushtarak shihet i shtrirë mbi automjet duke dëgjuar këngën “Levitating”, hitin e vitit 2020 të Dua Lipës, ndërsa furnizimet mjekësore ngarkohen në pjesën e pasme.

“Përshëndetje. Dua Lipa iu bashkua fushatës dhe bleu një kamionçinë për Batalionin e Parë Mjekësor. Mirupafshim,” shkroi në rrjetet sociale Roman Hryshchuk.

Automjeti u pagua me fondet e mbledhura për Driving Ukraine në një event të organizuar nga Service95 në juglindje të Londrës muajin e kaluar.

Ky event ishte pjesë e serisë së saj “Club For…”, ku të ftuarit kërcyen me muzikë techno, latin funk dhe disco nga artistë të ndryshëm.

Batalioni i Parë i Veçantë Mjekësor ka realizuar më shumë se 500 evakuime mjekësore të synuara dhe së fundmi u bë lajm në Ukrainë për evakuimin e gjashtë ushtarëve të plagosur brenda një dite duke përdorur mjete tokësore pa pilot.

Anesa Lipa, nëna e këngëtares, ishte e përfshirë në dërgimin e automjetit nga Mbretëria e Bashkuar në Ukrainë, sipas Kyiv Post.

“Sa di unë, automjeti u dorëzua në Ukrainë si pjesë e një kolone humanitare ku ishte edhe nëna e këngëtares,” tha Volodymyr Koval, përgjegjës për komunikimin në Batalionin e Parë të Veçantë Mjekësor.

Dua Lipa lindi në vitin 1995 nga prindër kosovarë shqiptarë që u larguan nga konflikti dhe paqëndrueshmëria politike në Ballkan. Ajo ka thënë se ndihet “shumë afër” njerëzve që vuajnë nga luftërat për shkak të historive që ka dëgjuar për luftën e Kosovës në vitin 1998.

“Kam dëgjuar histori nga miq që kanë humbur familjarë. Shtëpi të djegura. I kam parë vetë. Kur ke këtë lidhje të drejtpërdrejtë me njerëz që kanë kaluar luftë, të hapet një botë krejt tjetër,” tha ajo në vitin 2024.

Dua Lipa nuk është e vetmja figurë e njohur që ka mbështetur publikisht Ukrainën kohët e fundit. Në mars, aktori amerikan Sean Penn mungoi në ceremoninë e Oscars për të vizituar zonat e vijës së frontit në rajonin e Donetskut me Brigadën e 157-të të Mekanizuar.

Ai mori një çmim simbolik Oskar të bërë nga metali i një treni ukrainas të goditur nga raketat ruse, si shenjë falënderimi nga vendi. / Telegraph – Syri.net