Kampi i Gjadrit/ Aktivistja: Emigrantët mbahen të izoluar pa kontakte, shkelje e të drejtave ...

Marrëveshja e firmosur mes kryeministrit Edi Rama dhe homologes italiane Giorgia Meloni për ndërtimin e qendrave të pritjes së emigrantëve në Gjadër ka ndezur një debat të ashpër publik, për mungesë transparence, shkelje të të drejtave të njeriut dhe cenim të sovranitetit kombëtar. Sipas zërave kritikë, kampi në Gjadër nuk do të jetë një qendër e zakonshme pritjeje, por një formë “paraburgimi”.

E ftuar ditën e sotme në 'Kafe Shqeto', aktivistja Sidorela Vatnikaj tregoj se emigrantët, të cilët janë shpëtuar në det teksa synonin të arrinin në Itali, do të transferohen në Shqipëri dhe do të strehohen në kampe të mbyllura.

Atyre do t'u kufizohet kontakti me botën e jashtme, përfshirë familjarët, duke pasur si lidhje të vetme avokatët e tyre.

Sipas saj, kjo marrëveshje është cilësuar si tejet problematike, duke ngritur shqetësime serioze për të drejtat e njeriut.

Vatnikaj thekson se këta emigrantë nuk e kanë pasur kurrë Shqipërinë si destinacion dhe transferimi i tyre në një vend të tretë, kundër vullnetit të tyre, përbën një shkelje të parimeve themelore.

Në përfundim Vatnikaj thekson se Shqipëria po i dhuron Italisë autonomi mbi një pjesë të territorit të saj pa një bazë të qartë ligjore.

Ky akt konsiderohet si një precedent i rrezikshëm që cenon integritetin territorial të vendit.

Deklarata e plotë:

“Ne kemi folur edhe më përpara për marrëveshjen për ndërtimin e kampit të Gjadrit.  Në fakt, ne kemi kundërshtuar që nga fillimi pa ditur ndoshta as termat me të cilët është lidhur kjo marrëveshje, por duke ditur vetëm qëllimin, i cili ishte ndërtimi i disa kampeve nga të cilat do të strehoheshin emigrantë të cilët synonin të shkonin në Itali, në një vend të Bashkimit Europian, dhe pastaj do vendoseshin në këto qendra pritje, që më shumë i ngjanin një qendre paraburgimi, për shkak sepse emigrantët e shpëtuar në det ose emigrantët të cilët janë në proces gjyqësor për të marrë vendimin nëse do të fitojnë të drejtën e azilit, do të qëndrojnë në këto kampe të mbyllur, pa kontakt me telefon me familjen e tyre dhe i vetmi kontakt me botën jashtë do të ishte me avokatin e tyre herë pas here.

Pse kemi menduar që ka qenë një marrëveshje tejet problematike? Së pari sepse dëmtimi i të drejtave të njeriut të emigrantëve në këtë rast, të cilët nuk janë nisur për të shkuar drejt Shqipërisë, nuk e kanë zgjedhur Shqipërinë si destinacionin e tyre, por janë nisur për të shkuar drejt Italisë.

Së dyti sepse është një marrëveshje totalisht e bërë në hije dhe me vullnetin, dëshirën dhe aprovimin vetëm të një personi, të një individi në përsa i përket anës shqiptare, që është kryeministri Rama.

 Së treti sepse është një marrëveshje ë model për herë të parë, e cila i dhuron  autonominë dhe të drejtën për t'u ushtruar, në këtë rast në Gjadër, autonominë që shteti shqiptar ja dhuron Italisë, pa pasur asnjë bazë të saktë ligjore pse kjo ndodh.

Na është thënë se po i kthejmë borxhin Italisë, për shkak se na ka ndihmuar në vitet '90, ndërkohë që ndihma për emigrantët të cilët janë në vështirësi, ndihma për njerëzit...

Po filloi kjo puna e larjes së borxheve, nuk e di se deri ku do shkojmë, a do na ngelet më ndonjë Shqipëri ose ndonjë copës.

Megjithatë, unë mendoj që ka qenë një mënyrë shumë e gabuar jo vetëm e marrëveshja për të gjitha aspektet ligjor, për faktin që shkelen e drejta e njeriut, por edhe për faktin sepse ne jemi mësuar me një kryeministër i cili i ka forma të veta të korruptimit të të huajve në këtë rast, të qeverive të huaja, të përfaqësuesve të huaj diplomatikë, me këmbim për të marrë mbrapsht vetëm mbështetjen e vet si kryeministër i Shqipërisë në arenën ndërkombëtare".