A do të luajë ndaj Bayernit? Mësohet gjendja Vitinhës pas dëmtimit ndaj Lyonit

Paris Saint-Germain ka dhënë më shumë detaje lidhur me dëmtimin e Vitinhas, të pësuar gjatë ndeshjes kundër Lyonit.

Lojtari portugez ka pësuar një inflamacion në thembrën e djathtë dhe për këtë arsye do të mbetet nën trajtim në ditët në vijim.

Klubi ende nuk ka përcaktuar kohën e rikuperimit, ndërsa vlerësime të tjera pritet të bëhen drejt fundit të javës.

Si pasojë, Vitinha do të mungojë me siguri në dy ndeshjet e ardhshme të Ligue 1: ndaj Nantes në shtëpi të mërkurën dhe kundër Angers në transfertë të shtunën.

Më pas, kampionët francezë do të përballen me Bayern Munich në ndeshjen e parë gjysmëfinale të Ligës së Kampionëve më 28 prill.

Mesfushori u ul keq në këmbën e djathtë pas një dueli në ajër gjatë ndeshjes së së dielës kundër Lyon dhe nuk mundi të vazhdonte lojën.

Në minutën e 39-të, trajneri Luis Enrique e zëvendësoi me Warren Zaire-Emery.

Fillimisht ai u largua drejt tunelit, për t’u rikthyer më pas duke çaluar drejt stolit, pa këpucën në këmbë dhe dukshëm i paaftë për të mbajtur peshën.

Nga ana tjetër, edhe Bayern Munich do të ketë mungesa të rëndësishme për përballjen me PSG-në.

Serge Gnabry ka pësuar një dëmtim serioz në muskujt aduktorë gjatë stërvitjes para ndeshjes kundër Stuttgartit.

Ai do të mungojë për pjesën e mbetur të sezonit, ndërsa pjesëmarrja e tij në Botërorin e kësaj vere është gjithashtu në rrezik.