Palokastra në 'heshtje', emigracioni zbraz fshatin në Gjirokastër

Në fshatin Palokastër, në qarkun e Gjirokastër, sot mbizotëron një qetësi e pazakontë. Rrugët janë pothuajse të zbrazura, ndërsa në shumë prej shtëpive që dikur gumëzhinin nga jeta kanë mbetur vetëm të moshuarit.

Banorët tregojnë se prej vitesh të rinjtë janë larguar drejt emigracionit, në kërkim të një jete më të mirë. Kjo lëvizje ka lënë pas jo vetëm shtëpi të mbyllura me kyç, por edhe kujtimet e një komuniteti dikur të gjallë.

Dikur, Palokastra njihej për zhvillimin e bujqësisë dhe blegtorisë. Tokat punoheshin rregullisht dhe jeta në fshat ishte aktive. Sot, kjo tablo ka ndryshuar ndjeshëm. Aktiviteti ekonomik është zbehur, ndërsa prania njerëzore është rralluar dukshëm.

Në rrugët e fshatit mund të shohësh vetëm herë pas here ndonjë të moshuar që endet i vetëm, duke dëshmuar për një realitet të vështirë që ka mbetur pas largimit të brezave të rinj.

Palokastra mbetet një tjetër shembull i boshatisjes së zonave rurale në Shqipëri, ku mungesa e mundësive vazhdon të shtyjë të rinjtë drejt largimit, duke lënë pas një të ardhme të pasigurt për ata që kanë mbetur.