Trupi i shqiptarit ishte futur në një thes me blloqe betoni, familjes iu bë presion të mos e kërkonte

Dalin në dritë detaje të reja nga vrasja e Miklovan Dakajt në Spanjë. Sipas medieve spanjolle, trupi i tij ishte futur në një thes me blloqe çementi dhe ishte hedhur në një rezervuar. Familjes i ishte bërë presion që të mos e kërkonte

Nga Claudia Barroso, TELE CINCO

Më 14 tetor 2025, u gjet trupi i pajetë i një personi brenda një thesi në rezervuarin e Casasola-s në Almogía, Málaga. Viktima është identifikuar si një shtetas shqiptar 31-vjeçar që jetonte në Benahavís. Ishte partnerja e tij ajo që denoncoi zhdukjen, ndërsa familja raportoi se kishte marrë “presione” për të ndaluar kërkimin e tij.

Pas muajsh hetimesh, autoritetet kanë arrestuar tre persona si të dyshuar për vrasjen e të riut. Hipotezat e para sugjeronin se bëhej fjalë për një zhdukje jo të qëllimshme, pasi agjentët zbuluan se i riu kishte shkuar në vendin e takimit me të dyshuarit dhe ishte hipur në makinë me dy prej tyre, duke u drejtuar drejt zonës malore pranë rezervuarit. Pesë muaj më vonë, trupi i tij u gjet nga një burrë që po kalonte rastësisht në atë zonë.

I riu, përveçse ishte vrarë, ishte edhe i lidhur dhe ishte hedhur në rezervuar brenda një thesi. Kur u gjet, trupi ndodhej në gjendje saponifikimi, por u arrit të identifikohej falë disa tatuazheve ende të dukshme. Autorët kishin vendosur blloqe betoni brenda thesit për ta fundosur trupin në fund të rezervuarit. Megjithatë, ata nuk kishin parashikuar një ulje të konsiderueshme të nivelit të ujit në digë, gjë që bëri të mundur zbulimin e trupit, sipas raportimit të “Diario Sur”.

Sa i përket mënyrës se si u arrit tek autorët e dyshuar, agjentët konfirmuan se bëhej fjalë për një shtetas shqiptar, zhdukja e të cilit ishte denoncuar disa muaj më parë në Marbella nga partnerja e tij. E vetmja pistë që kishte policia ishte makina ku ishte hipur i zhdukuri, e cila ishte marrë me qira në një biznes në Barcelonë nga një grua. Të arrestuarit dyshohet se kishin lëvizur me këtë makinë në zonë gjatë ditëve para krimit.

Autoritetet arritën të identifikonin gruan që kishte marrë makinën me qira dhe falë kësaj gjurmë u identifikuan autorët e dyshuar të vrasjes: dy burra, gjithashtu shqiptarë, të moshave 36 dhe 45 vjeç. Të dy u arrestuan në shkurt dhe aktualisht ndodhen në burg, të akuzuar për vrasjen e të riut. Gjithashtu, ende nuk është sqaruar marrëdhënia mes gruas dhe të arrestuarve, por gjithçka tregon se edhe ajo mund të jetë e përfshirë në krim.