Ankth tek Juventusi, Yildiz stërvitet i veçuar për shkak të një problemi në gju

Tek Juventusi po shtohet shqetësimi për gjendjen fizike të talentit turk, Kenan Yildiz. Numri 10 bardhezi nuk është stërvitur me grupin në seancën e fundit në Continassa, por ka zhvilluar një program të diferencuar për shkak të një inflamacioni në gjurin e majtë.

Pas një paraqitjeje jo në nivel ndaj Atalanta, ku u zëvendësua herët, gjendja e tij ka ngritur dyshime. Problemi në gju nuk është i ri, pasi lojtari ka disa javë që po përballet me këtë shqetësim, i cili ishte shfaqur edhe para sfidës së fundit.

Megjithatë, pavarësisht dhimbjes, Yildiz kishte zbritur në fushë si titullar, por vazhdimi i shqetësimit ka bërë që stafi mjekësor i klubit të ndërhyjë me kujdes, duke i dhënë një pushim të kontrolluar për të shmangur përkeqësimin.

Trajneri Luciano Spalletti dhe stafi i tij do të monitorojnë nga afër gjendjen e lojtarit ditë pas dite. Objektivi është rikuperimi i plotë i tij për ndeshjet e ardhshme, duke qenë se Juventusi do të luajë gjashtë javë vendimtare në kampionat, ku prania e Yildiz konsiderohet thelbësore.

Klubi bardhezi nuk dëshiron të rrezikojë me një rikthim të parakohshëm, që mund të sjellë pasoja më serioze në këtë fazë vendimtare të sezonit.