Guardiola zbulon ‘goditjen’ e sezonit: Zgjedhja që ndryshoi Manchester Cityn

Trajneri i Manchester Cityt, Pep Guardiola, ka zbuluar se vendimi më i mirë që ka marrë këtë sezon lidhet me një zgjedhje brenda dhomave të zhveshjes: emërimin e Bernardo Silvës si kapiten të skuadrës.

“Qytetarët” po hyjnë në fazën më vendimtare të sezonit në Premier League, duke ndjekur nga afër Arsenalin në garën për titull.

Pavarësisht disa hapave fals si barazimet ndaj Nottingham Forest dhe West Ham, City ka reaguar me rezultate pozitive në kompeticionet e tjera.

Skuadra e Guardiolës ka rikthyer besimin pas triumfit në Carabao Cup dhe fitores bindëse 4-0 ndaj Liverpoolit në FA Cup.

Guardiola nuk i kurseu elozhet për Silvën, duke e cilësuar si një lider të vërtetë dhe një nga lojtarët më të rëndësishëm që ka pasur ndonjëherë në skuadër.

Sipas tij, portugezi është shembulli perfekt i një futbollisti që vendos ekipin mbi gjithçka, sidomos në momentet më të vështira.

Ai solli në vëmendje edhe sezonin e kaluar, ku Silva u dallua për qëndrueshmërinë dhe ndikimin në skuadër, pavarësisht problemeve fizike.

Edhe pse nuk është lojtari më dominues fizikisht apo më i spikatur në statistika, ai shfaqet gjithmonë në ndeshjet e mëdha.

Megjithatë, e ardhmja e mesfushorit mbetet në pikëpyetje. Vetë lojtari ka lënë të kuptohet se mund të largohet në fund të sezonit për arsye personale, duke menduar një rikthim në Europën jugore.

Guardiola pranoi se do të dëshironte ta mbante në skuadër, por theksoi se vendimi final i përket vetë lojtarit.

Sa i përket garës për titull, tekniku spanjoll u tregua i qartë: për të kapur Arsenalin, City duhet të fitojë çdo ndeshje të mbetur.

Sipas tij, mungesa e qëndrueshmërisë gjatë sezonit i ka kushtuar shtrenjtë ekipit, duke mos lënë më hapësirë për gabime në javët e fundit.