Politico: Plani sekret i Maduros në 2020 për të blerë raketa balistike nga Irani që mund të godisnin SHBA-në
Një plan i panjohur më parë i Venezuelës për të siguruar raketa balistike nga Irani është zbuluar nga media amerikane Politico, duke hedhur dritë mbi negociata të avancuara mes dy vendeve.
Sipas raportimit, Ministria e Mbrojtjes e Venezuelës kishte akorduar në vitin 2020 mbi 400 milionë dollarë për blerjen e një sistemi raketor balistik nga Irani. Në atë kohë, shqetësimet për bisedime mes Karakasit dhe Teheranit mbi raketa të afta për të arritur territorin amerikan ishin ngritur gjatë administratës së Donald Trump.
Megjithatë, sipas ish-përfaqësuesit special të SHBA për Iranin dhe Venezuelën, Elliott Abrams, Karakasi u tërhoq nga marrëveshja pas paralajmërimeve të Uashingtonit dhe nuk përfundoi blerjen e armëve nga Teherani.
Një memorandum i datës 17 janar 2020, i miratuar nga ministri i atëhershëm i Mbrojtjes Vladimir Padrino López, tregon se bisedimet ishin më të avancuara sesa ishte bërë e ditur publikisht. Dokumenti përshkruante detajet e transaksionit, duke përfshirë financimin përmes kompanive shtetërore dhe përdorimin e sistemeve nga platforma detare në anijet ushtarake të Venezuelës.
Sipas Abrams, administrata Trump ishte në dijeni të kontakteve mes Karakasit dhe Teheranit dhe kishte bërë të qartë se një marrëveshje e tillë ishte “e papranueshme”, edhe pse ai deklaroi se nuk kishte dijeni për dokumentin konkret.
Rreth shtatë muaj pas hartimit të memorandumit, në gusht 2020, presidenti venezuelian Nicolás Maduro deklaroi se blerja e raketave nga Irani “nuk kishte qenë në planet” e vendit, por e cilësoi atë si “një ide të mirë”.
Siç thekson Politico, Irani ka furnizuar më herët Venezuelën me pajisje ushtarake, përfshirë edhe sisteme dronësh.