Qëndrimi i Iranit për uraniumin vë në dyshim armëpushimin dhe një marrëveshje paqeje

Deklaratat e fundit nga zyrtarët iranianë për programin bërthamor kanë shtuar pasiguritë mbi të ardhmen e armëpushimit dhe mundësinë e arritjes së një marrëveshjeje paqeje me Shtetet e Bashkuara.

Kreu i agjencisë bërthamore të Iranit ka përjashtuar çdo kufizim mbi pasurimin e uraniumit, një kërkesë kyçe e SHBA-së, duke rritur dyshimet se negociatat e pritshme mund të përballen me pengesa serioze.

Sipas raportimeve, mbetet e paqartë se kush po merr vendimet kryesore në Iran, ndërsa një sërë deklaratash nga zyrtarë të lartë kanë vënë në pikëpyetje bazën e bisedimeve që pritet të zhvillohen këtë fundjavë në Islamabad.

Gjatë konfliktit, SHBA dhe Izraeli kanë theksuar se synimi kryesor ka qenë ndalimi përfundimtar i aftësisë së Iranit për të ndërtuar armë bërthamore. Në këtë kuadër, Sekretari amerikan i Mbrojtjes, Pete Hegseth, ka deklaruar se Irani duhet të dorëzojë uraniumin e pasuruar, përndryshe SHBA do të ndërhyjë për ta marrë atë.

Megjithatë, deklaratat e fundit nga pala iraniane bien në kundërshtim me këtë kërkesë, duke sinjalizuar se rruga drejt një marrëveshjeje mbetet e vështirë dhe e pasigurt./BBC