Gianluigi Donnarumma ‘qan’ për Italinë: Ndiej përgjegjësi, por do të rikthehemi më të fortë

Kapiteni i Italisë, Gianluigi Donnarumma, u shfaq i prekur emocionalisht në një intervistë për Sky Sport, pas një tjetër zhgënjimi të madh për kombëtaren “azzurre”, që mbeti jashtë Botërorit për herë të tretë radhazi.

Portieri italian, i rikthyer te klubi i tij pas eliminimit, nuk i mbajti dot lotët teksa foli për momentet e vështira pas humbjes ndaj Bosnjë Herzegovinës në Zenicë. “Kanë qenë ditë shumë të rënda për ne, është një dhimbje e madhe. Në fillim ishte e vështirë ta pranoja këtë eliminim, por duhet të ngrihemi dhe të ecim përpara”, u shpreh ai.

Donnarumma komentoi edhe marrëdhënien me figurat kryesore të kombëtares: “Kam pasur një raport shumë të mirë me trajnerin, me Gianluigi Buffon dhe me Gennaro Gattuso-n. Më vjen keq sidomos për ta. Është normale të ndiej një pjesë përgjegjësie për situatën që po kalojmë”.

Ai kujtoi edhe momentet e lavdishme të triumfit në UEFA Euro 2020 (luajtur në 2021), duke theksuar nevojën për reagim: “Kemi arritur gjëra të mëdha dhe duhet ta mbajmë mend këtë. Italia do të rikthehet, jam i bindur se do të vijmë më të fortë dhe më të bashkuar”.

Në fund, portieri preku edhe polemikat mbi shpërblimet: “Jam ndier i lënduar nga disa komente. Si kapiten, nuk kam kërkuar kurrë para. Ishte vetëm një shpërblim simbolik në rast kualifikimi. Askush nuk kërkoi asgjë”.

Pavarësisht zhgënjimit, Donnarumma mbetet i fokusuar tek e ardhmja, duke kujtuar se Italia ka përpara sfida të rëndësishme, përfshirë Europianin dhe Ligën e Kombeve, si hapa për t’u rikthyer në elitën e futbollit botëror.