Gjermania akuzon JD Vance për hipokrizi, pas pretendimeve se BE ndërhyri në zgjedhjet e Hungarisë
Gjermania qortoi të mërkurën JD Vance për hipokrizi, ndërsa kundërshtoi akuzën e nënpresidentit të SHBA-së se Brukseli po ndërhynte në zgjedhjet e Hungarisë.
Berlini tha se, përkundrazi, vizita e Vance në Budapest pak para votimit të së dielës sugjeron se ai vetë mund të jetë fajtor për ndërhyrje në zgjedhje, pasi ai mbështeti fuqishëm qeverinë populiste-nacionaliste.
“Ne hedhim poshtë akuzën e bërë nga zëvendëspresidenti i SHBA-së JD Vance në një aktivitet në Hungari”, në lidhje me ndërhyrjen e BE-së, u tha gazetarëve zëvendëszëdhënësi i qeverisë, Sebastian Hille gjatë një konference për shtyp.
“Do të doja të theksoja — meqenëse Vance po ankohet për ndërhyrjen e supozuar të BE-së në zgjedhje — se zëvendëspresidenti i SHBA-së ishte në Hungari vetëm pak ditë para zgjedhjeve. Vetëm ky fakt flet vetë se kush po ndërhyn”, shtoi ai.
Duke qëndruar pranë kryeministrit hungarez Viktor Orbán në Budapest të martën, Vance argumentoi se “ajo që ka ndodhur në këtë vend, ajo që ka ndodhur në mes të kësaj fushate zgjedhore, është një nga shembujt më të këqij të ndërhyrjes së huaj në zgjedhje që kam parë ndonjëherë ose kam lexuar për të”.
Vance kritikoi gjithashtu “burokratët në Bruksel, të cilët kanë bërë gjithçka që munden për të mbajtur nën kontroll popullin e Hungarisë, sepse nuk u pëlqen udhëheqësi, i cili në fakt ka mbrojtur popullin e Hungarisë”.
Pasi dha një mbështetje të plotë për Orbán-in, zëvendëspresidenti u përball me kritika të menjëhershme nga opozita hungareze për përpjekjen për të vënë gishtin në peshore në zgjedhjet e një vendi tjetër. Shtëpia e Bardhë e sheh Orbán-in dhe të ashtuquajturën demokraci joliberale të tij, si një aleat ideologjik kyç në Evropë.
Presidenti i SHBA-së, Donald Trump, e ka mbështetur Orbánin disa herë gjatë fushatës, duke shënuar një shfaqje të pazakontë mbështetjeje nga SHBA-të për një udhëheqës evropian që po lufton për rizgjedhje.
Udhëheqësi i opozitës, Péter Magyar, kritikoi vizitën e Vance në X. “Asnjë vend i huaj nuk mund të ndërhyjë në zgjedhjet hungareze”, shkroi ai. “Ky është vendi ynë. Historia hungareze nuk është shkruar në Uashington, Moskë apo Bruksel – është shkruar në rrugët dhe sheshet e Hungarisë.”
Zëdhënësi i qeverisë gjermane tha gjithashtu se kancelari Friedrich Merz nuk kishte “asnjë preferencë” në lidhje me rezultatin e votimit të së dielës dhe do të pranonte mënyrën se si votoi populli hungarez./ Politico.