Atletico Madridi përgatit ‘kurthin’ ndaj Lamine Yamal-it

Sfida e sotme në çerekfinalet e UEFA Champions League mes Barcelonës dhe Atletico Madridit pritet të ketë në qendër të vëmendjes talentin e ri spanjoll, Lamine Yamal, i cili po konsiderohet një nga armët kryesore të katalanasve.

Vetëm 18 vjeç, Yamal vjen pas një paraqitjeje të shkëlqyer në LaLiga, ku ndihmoi Barcelonën të fitojë 2-1 pikërisht ndaj Atletico Madridit. Forma e tij ka alarmuar trajnerin e madrilenëve, Diego Simeone, i cili sipas mediave spanjolle po përgatit një plan të veçantë për ta neutralizuar.

Strategjia e Atleticos pritet të përfshijë presion të vazhdueshëm dhe mbulim të dyfishtë ndaj anësorit, me qëllim kufizimin e hapësirave dhe ndikimit të tij në lojë. Por jo vetëm kaq: objektivi i madrilenëve mund të jetë edhe provokimi i lojtarit për ta detyruar të marrë një karton të verdhë.

Yamal ndodhet në prag pezullimi, pasi ka grumbulluar katër kartonë në këtë edicion të Champions-it dhe një tjetër do ta linte jashtë ndeshjes së kthimit. Kjo e bën situatën edhe më delikate për Barcelonën, që tashmë duhet të përballet pa një tjetër lojtar kyç si Raphinha.

Pavarësisht presionit dhe “kurthit” të mundshëm, Yamal synon të konfirmojë talentin e tij edhe në këtë sfidë të madhe dhe të ndihmojë Barcelonën të hedhë një hap drejt gjysmëfinaleve.

Barcelona synon të marrë një rezultat pozitiv në ndeshjen e parë, për të hedhur një hap të rëndësishëm drejt gjysmëfinales së Champions League, përballë një kundërshtari të fortë si Atletico.