Rama e përjashtoi nga takimi tek 5-sa, pasi i përgojoi të preferuarën/ Tmerrohet Braçe: Nuk jam kundër Ogertës...

Erion Braçe është mërzitur shumë më shefin pasi ky i fundit e ka përjashtaur nga takimet e zhvilluara në njësinë e tij elektorale, Njësia Nr.5 dhe ka dhënë një mesazh servilizmi ndaj Ramës.

Braçe shprehet i mërzitur  lidhur me mungesën e tij në mbledhje, teksa shprehet se i njeh shumë mirë problematikat e atij komuniteti.

“Kjo mania për të shkulur deputetin nga zona – me arsyen se krijon lidhje njerëzore e mezi shkulet pastaj, është gabim” – shkruan Braçe. Ai shton se nuk është kundër Ogerta Manastirliut, por “dua t’i jap PS dhe qytetit një alternativë tjetër”.

Kujtojmë se sipas të thënave që përcjellin burimet nga kampi i rilindjes Erion Braçe ka folur lart e poshtë kundër kandidaturës së Ogerta Manastirliut kur ajo u propozua si kandidate për Tiranën, madje ka shfaqur edhe ambicie për të qenë ai kandidat. Por nga sa duket në postimin e tij, jo vetëm që nuk i shkon më mendja për të kandiduar, por Braçe ka kuptuar që fjalët e tij për të preferuarën Manastirliu kanë mbërritur në veshin e shefit dhe kjo e ka bërë që në gjendje paniku të reagojë dhe të shpjegohët gjatë përmes postimit në rrjetet sociale.

“Në fund, kjo paranoja “Erionin e kemi kundër”, pasuar me këtë “markimin” që kurrë s’u bë karburanteve – fjala bie, por njerëzve ju bëhet, është qesharake, sinqerisht! Ua thashë edhe në Asamblenë e 5 ses – nuk jam kundër Ogertës; thjesht dua t’i jap PS dhe qytetit që nuk po qeveriset e nuk shërben, një alternativë tjetër; Më thjeshtë se kaq nuk ka!”, - shkruan Braçe mes të tjerash.

Reagimi i plotë;

#TiranaEmadhe nisur nga #5sa Java e mirë e #Pashkës dhe hudhra që nuk duhet! Ishte realisht një javë e mirë; mbyllet sot dhe dua t’i them disa fjalë: Shumë faleminderit edhe një herë për gjithë mesazhet, telefonatat – përkrahjen, mbështetjen, vlerësimet, gatishmërinë për të punuar bashkë;
Shumë faleminderit posaçërisht socialistëve të asambleve të PS me të cilët u takova e shtrengova duart këtë javë;

Ju jam shumë mirënjohës! Faleminderit gjithashtu për urimet e ditës së lindjes edhe pse kam kohë që kujtoj ngjarjet e jetuara në një vit më shumë se sa numrat! Urimet për Pashkë i kemi bashkë, e kjo javë, me Bajramin që i parapriu, Pashkën Ortodokse që pason, është përshkrimi prej Zotit i asaj që jemi në një dimension; Kështu që gezuar kujtdo!

Tani hudhra e javës! Një histori e parë që përsëritet e më ndjek nga mbrapa nga Lushnja e Divjaka; një histori deliri dhe e padenjë, tërësisht jo produktive e që kërkon të ndërtojë madhështinë qesharake, gjithnjë duke më ndjekur pas.
Shikoni;

Kjo mania për të shkulur deputetin nga zona – me arsyen se krijon lidhje njerëzore e mezi shkulet pastaj, është gabim; Jo për deputetin, por për njerëzit! Paqëndrueshmëria në marrëdhënie me ta, është mungesë serioziteti dhe dëmton punën. Politika është punë me njerëzit, marrëdhënie besimi që nuk vendoset me orë, as ditë por merr vite! Po flas për deputetët që territorin e kanë punë, as zyrë, as mburrje, as delegim për njerëz pa mandat, pa njohje, pa dije e pa ndikim kund!

Thënë kjo, të zëvendësosh deputetin e votuar nga njerëzit me drejtorokracinë, është e pamend, sado elegant të jetë emri që i vëmë; tërësisht e pamend në raport me qëllimet që ke, veçanërisht kur delegon pushtet partiak tek ta, për të kapërcyer deputetin; veçanërisht kur harron që një arsye pse punëtorë partie demotivohen është drejtorokracia e padurueshme.
Në fund, kjo paranoja “Erionin e kemi kundër”, pasuar me këtë “markimin” që kurrë s’u bë karburanteve – fjala bie, por njerëzve ju bëhet, është qesharake, sinqerisht! Ua thashë edhe në Asamblenë e 5 ses – nuk jam kundër Ogertës; thjesht dua t’i jap PS dhe qytetit që nuk po qeveriset e nuk shërben, një alternativë tjetër; Më thjeshtë se kaq nuk ka!