Sot e Shtuna e Madhe e Pashkëve, në mbrëmje mesha në katedralen e 'Shën Palit'

Për besimtarët katolikë sot është e Shtuna e Madhe, dita e tretë e Treditëshit e Nata e Shenjtë e Pashkëve të Ngjalljes së Krishtit.

Në Tiranë besimtarët do të marrin pjesë në meshën që mbahet në Katedralen e "Shën Palit" nën udhëheqjen e Arqipeshkvit Metropolit, Imzot Arjan Dodaj.

Mesha nis në orën 21:45 dhe zgjat deri në orën 01:30 të mëngjesit të nesërm.

Besimtarët e krishterë, në këtë Natë të Shenjtueshme, janë në pritje të kumtimit të Lajmit të Mirë të Ngjalljes së Jezu Krishtit. 

Vetëm pas Vigjiljes kremtore – pas kësaj nate të pagjumë të së Shtunës së Madhe të Pashkëve, fillon gëzimi i  Ngjalljes së Krishtit, fillon koha e Pashkëve e cila zgjat për 50 ditë, deri në festën e Rrëshajëve – Ardhjes së Shpirtit Shenjt Zot.

Simbolet

 Nata e Pashkëve është plot me Simbole. 

Kemi bekimin e dy elementeve të rëndësishme kozmike: zjarri i ri dhe uji.

Qiriu i bardhë ndizet nga zjarri i ri që bekohet në fillim të liturgjisë hyjnore të kësaj Nate të Pashkëve.

 Qiriu simbolizon fitoren e Dritës së Krishtit të Ngjallur mbi errësirën e vdekjes.
Kremtimi i Natës së Pashkëve vijon me liturgjinë e Fjalës së Hyjit. Dymbëdhjetë lexime bible nga Besëlidhja e Vjetër dhe Besëlidhja e Re

Pastaj, festa e madhe në tryezën e lulëzuar për të komunikuar me Qengjin e Pashkëve, me Krishtin e vdekur e të Ngjallur që shkëlqen mbi errësirat e mbi vetmitë shkatërrimtare.