Mesazh frymëzues nga presidentja Vjosa Osmani para sfidës vendimtare Kosovë–Turqi

Pak orë para një prej ndeshjeve më të rëndësishme në historinë e futbollit kosovar, presidentja e vendit, Vjosa Osmani, ka dhënë një mesazh emocional dhe motivues për Kombëtaren e Kosovës.

Përmes një postimi në rrjetet sociale, ajo ka vënë në pah rrugëtimin e vështirë të Kosovës si shtet, duke e krahasuar atë me sakrificat dhe përkushtimin që “Dardanët” tregojnë në fushën e lojës. Sipas saj, kjo ndeshje nuk është vetëm një përballje sportive, por edhe një reflektim i historisë dhe identitetit të një populli të tërë.

“Kosova ka lindur mes vështirësive e sakrificave, është rritur me krenari dhe sot qëndron në fushë me dinjitet, duke përfaqësuar ëndrrat e një populli të tërë”, ka shkruar ajo në mesazhin e saj.

Presidentja ka vlerësuar lart futbollistët e Kosovës, duke i cilësuar si simbol të qëndresës, guximit dhe shpresës për të ardhmen. Ajo ka theksuar se e gjithë Kosova qëndron pas tyre në këtë moment vendimtar.

“Ju jeni simbol i qëndresës, i guximit dhe i shpresës. Jemi me ju djema. Me Kosovën përgjithmonë. Me Dardanët”, ka shtuar Osmani.

Sfida mes Kosovës dhe Turqisë, që nis në orën 20:45, është vendimtare për kualifikimin në Kupën e Botës 2026. Fituesi i këtij dueli do të sigurojë një vend në turneun më të madh të futbollit botëror.

Atmosfera pritet të jetë e zjarrtë, me tifozët që do të mbështesin pa rezerva Kombëtaren në këtë mbrëmje historike.