Evropa kundërshton operacionet ushtarake amerikane, ndërsa rriten shqetësimet për luftën me Iranin

Franca dhe Italia i janë bashkuar Spanjës në kundërshtimin e operacioneve ushtarake SHBA-Izrael, thanë burime të martën, ndërsa Presidenti i SHBA-së Donald Trump veçoi aleatët e NATO-s në Evropë, si të padobishëm në luftën njëmujore, duke theksuar përçarjet.

Vendimet erdhën në një sfond tensionesh midis Uashingtonit dhe partnerëve kryesorë për shkak të luftës në Iran. Më herët këtë muaj, Trump i quajti aleatët e hershëm të NATO-s "frikacakë" për shkak të mungesës së mbështetjes së tyre kundër Iranit.

Të martën, ai kritikoi ashpër vendet që nuk ndihmuan në sulmet amerikane-izraelite ndaj Iranit, përfshirë Francën, duke shkruar në Truth Social:

"Vendi i Francës nuk do të lejonte që aeroplanët që shkonin në Izrael, të ngarkuar me furnizime ushtarake, të fluturonin mbi territorin francez. Franca ka qenë SHUMË E PADOBISHME në lidhje me 'Kasapin e Iranit', i cili është eliminuar me sukses! SHBA-të do ta KUJTOJNË!!! Presidenti DJT."

FRANCA THOTË JO

Një diplomat perëndimor dhe dy burime të njohura me çështjen, i thanë Reuters se Franca nuk e lejoi Izraelin të përdorte hapësirën e saj ajrore për të transportuar armë amerikane, që do të përdoren në luftën kundër Iranit. Avionët izraelitë po mbanin armët, prandaj ata bënë kërkesën, tha një nga burimet.

Burimet thanë se refuzimi, i cili ndodhi në fundjavë, ishte hera e parë që Franca e kishte bërë këtë që nga fillimi i konfliktit më 28 shkurt. As presidenca franceze dhe as ministria e jashtme nuk ishin menjëherë të disponueshme për koment.

ITALIA REFUZOI LEJEN

Italia javën e kaluar mohoi lejen që avionët ushtarakë amerikanë të uleshin në bazën ajrore Sigonella në Siçili, përpara se të niseshin për në Lindjen e Mesme, thanë burimet të martën.

Sipas së përditshmes Corriere della Sera, e cila e raportoi e para lajmin, “disa bombardues amerikanë” duhej të uleshin në bazën në Siçilinë lindore, përpara se të fluturonin drejt Lindjes së Mesme.

Raporti nuk specifikoi se kur duhej të uleshin avionët, por tha se leja iu refuzua sepse SHBA-të nuk kishin kërkuar leje dhe udhëheqja ushtarake e Italisë nuk ishte konsultuar, siç kërkohet sipas traktateve që rregullojnë përdorimin e instalimeve ushtarake amerikane në vend.

SPANJA, MË E ZËSHME KUNDËR LUFTËS

Spanja tha të hënën se kishte mbyllur hapësirën e saj ajrore për aeroplanët amerikanë të përfshirë në sulmet ndaj Iranit. Kryeministri Pedro Sanchez ka qenë ndër kritikët më të zëshëm të sulmeve të SHBA-së dhe Izraelit.

Spanja do të lejojë përdorimin e bazave të saj, vetëm nëse kjo do të ishte për “mbrojtjen kolektive” të aleatëve të NATO-s, tha të martën ministrja spanjolle e Mbrojtjes, Margarita Robles, duke sqaruar se mohimi i përdorimit të hapësirës ajrore spanjolle për aeroplanët amerikanë të përfshirë në konfliktin me Iranin, kishte qenë në fuqi që nga fillimi i luftës më 28 shkurt.

Spanja nuk ishte e shqetësuar për ndonjë hakmarrje, tha Ministri i Jashtëm Jose Manuel Albares në një intervistë për transmetuesin shtetëror TVE.

“Ne nuk kemi absolutisht frikë nga asgjë. Si mund të ketë frikë një vend nga diçka për mbështetjen e ligjit ndërkombëtar, paqes botërore dhe Kartës së Kombeve të Bashkuara? Në çfarë lloj bote do të jetonim nëse ata që duhet të kenë frikë, do të ishin ata që respektojnë ligjin?” tha ai.

DUKE SHIGJETUAR BRITANINË

Trump gjithashtu e veçoi Britaninë të martën si të padobishme, pikërisht kur Pallati i Buckinghamit konfirmoi se Mbreti Charles dhe Mbretëresha Camilla do të bëjnë një vizitë shtetërore në SHBA në fund të prillit.

Ai shkroi në Truth Social: “Të gjitha ato vende që nuk mund të marrin karburant për avionë për shkak të Ngushticës së Hormuzit, si Mbretëria e Bashkuar, e cila refuzoi të përfshihej në prerjen e kokës së Iranit, kam një sugjerim për ju: Numri 1, blini nga SHBA-ja, kemi me bollëk, dhe Numri 2, fitoni pak guxim të vonuar, shkoni në Ngushticë dhe thjesht MERRNI ATË.”

Shtetet e Bashkuara, Franca, Italia, Spanja dhe Britania e Madhe janë të gjitha anëtare të NATO-s./ Reuters.