Brazili në krizë identiteti, Ancelotti nuk ka ‘shkopin magjik’ për të rikthyer lavdinë

Humbja 2-1 ndaj Francës në miqësore ka rikthyer në pah problemet e thella të Brazilit, një skuadër që prej vitesh po kërkon veten dhe duket ende larg nivelit të fuqive më të mëdha të futbollit botëror.

Pavarësisht pranisë së trajnerit legjendar Carlo Ancelotti, Brazili nuk ka arritur të tregojë përmirësim të ndjeshëm. Disfata ndaj Francës, e cila luajti edhe me një lojtar më pak për një pjesë të mirë të takimit, nxori në pah një hendek që tashmë nuk duket më rastësor, por strukturor.

Një nga momentet që vazhdon të rëndojë mbi “Seleçaon” është ende trauma e ‘Mineirazo’-s, humbja historike 7-1 ndaj Gjermanisë në Botërorin 2014. Që nga ajo ndeshje, Brazili ka humbur sigurinë dhe shpesh shfaq dobësi psikologjike në momentet vendimtare.

Një tjetër problem madhor mbetet mungesa e liderëve. Epoka e Neymar duket drejt fundit, e shoqëruar nga dëmtime dhe mungesë vazhdimësie, ndërsa figura me eksperiencë si Thiago Silva nuk janë më pjesë e ekipit. Edhe pse talente si Vinícius Júnior apo Marquinhos ofrojnë cilësi të lartë, mungon një lider i vërtetë që të marrë përgjegjësi në momentet e vështira.

Problemi nuk është vetëm individual, por edhe kolektiv. Brazili vazhdon të prodhojë lojtarë të mëdhenj, por nuk arrin t’i kthejë në një skuadër të organizuar dhe konkurruese. Ndërkohë, kombëtaret europiane shfaqin strukturë, disiplinë taktike dhe mentalitet fitues, duke e bërë diferencën gjithnjë e më të dukshme.

Në prag të FIFA World Cup 2026, rreziku për Brazilin është i qartë: të paraqitet si një ekip i papërfunduar dhe pa identitet. Më shumë se kurrë, “Seleçao” duket se ka humbur atë që për dekada e bënte unike, besimin se është superiore dhe lojën e lirshme plot fantazi.