Franca triumfon ndaj Brazilit në një miqësore plot emocione dhe tension

Një përballje spektakolare është zhvilluar në “Gillette Stadium” në SHBA, ku Brazili dhe Franca dhuruan një ndeshje të mbushur me gola, ritëm të lartë dhe momente nervozizmi. Në fund, ishin francezët që dolën fitues me rezultatin 2-1.

Skuadra e drejtuar nga Didier Deschamps e nisi më mirë takimin dhe arriti të kalonte në avantazh në minutën e 32-të. Pas një asistimi të shkëlqyer nga Ousmane Dembélé, ishte Kylian Mbappé që realizoi me klas, duke mposhtur portierin Ederson me një parabël elegante. Pjesa e parë u mbyll me avantazhin minimal të “Gjelave”.

Në fraksionin e dytë, sfida mori tjetër rrjedhë. Në minutën e 55-të, Dayot Upamecano u ndëshkua me karton të kuq pas një ndërhyrjeje si lojtar i fundit ndaj Wesley Franca, duke lënë Francën me një lojtar më pak. Megjithatë, edhe në inferioritet numerik, francezët arritën të shënonin sërish në minutën e 65-të me Hugo Ekitike, i cili përfitoi nga asistimi i Michael Olise.

Brazili reagoi në minutën e 77-të, kur Bremer shkurtoi diferencën pas një situate nga goditja e dënimit, me asist të Luis Henrique-s. Megjithatë, kjo nuk mjaftoi për të shmangur humbjen.

Në fund, Franca administroi avantazhin dhe siguroi një fitore prestigjioze në një miqësore që ofroi gjithçka: gola, spektakël dhe emocione deri në vërshëllimën e fundit.