Poloni – Shqipëri në statistika, historia nuk i favorizon kuqezinjtë, por nëse shënon Asllani...

Polonia pret Shqipërinë në këtë gjysmëfinale play-off të kualifikueseve për Kupën e Botës, ku të dyja kombëtaret synojnë të arrijnë dy fitore për të siguruar një vend në finalet e vitit 2026. Vendasit shpresojnë që forma e mirë e kohëve të fundit t’i ndihmojë të kalojnë këtë pengesë.

Forma aktuale: Polonia mund të ndihet disi e pafat që ndodhet në play-off, pasi zhvilloi një fazë grupi shumë të mirë (5 fitore, 2 barazime, 1 humbje), por u la pas nga një Holandë e fortë. Tani i duhen edhe dy fitore për të siguruar pjesëmarrjen në Botërorin e tretë radhazi. Megjithatë, forma e tyre mbetet pozitive, pasi janë të pamposhtur në gjashtë ndeshjet e fundit (4 fitore, 2 barazime), ku vetëm Holanda arriti t’i ndalë. Gjithashtu, pesë fitore në gjashtë ndeshjet e fundit në shtëpi (1 barazim) i japin shumë besim për të synuar finalen e play-off-it ndaj fituesit mes Suedisë dhe Ukrainës.

Shqipëria është kualifikuar në dy nga tri finalet e fundit të Kampionatit Europian (2016 dhe 2024), por ende pret debutimin në Kupën e Botës. Kuqezinjtë përfunduan në vendin e dytë në grup, pas një Anglie perfekte (4 fitore, 2 barazime, 2 humbje). Mes këtyre dy humbjeve ndaj Anglisë, skuadra ishte e pamposhtur në tetë ndeshje (6 fitore, 2 barazime), përfshirë tri fitore radhazi në transfertë, të gjitha me rezultatin 1-0. Megjithatë, kundërshtarët në këto ndeshje (Gjibraltari, Serbia dhe Andorra) nuk kanë të njëjtin nivel si Polonia, ndaj ekipi i drejtuar nga Sylvinho do të duhet të rrisë nivelin për të surprizuar vendasit.

Historia e përballjeve direkte: Polonia kishte fituar tetë përballjet e mëparshme mes dy ekipeve, para se Shqipëria të triumfonte 2-0 në takimin e fundit në shtator 2023. Megjithatë, polakët mbeten të pamposhtur në shtatë ndeshjet që kanë zhvilluar si vendas ndaj Shqipërisë (6 fitore, 1 barazim).

Statistika interesante:

• Pesë nga gjashtë ndeshjet e fundit zyrtare të Polonisë kanë përfunduar me gola nga të dyja skuadrat.
• Asnjë nga gjashtë ndeshjet e fundit në shtëpi të Polonisë nuk ka pasur gol para minutës së 25-të.
• Shtatë nga tetë ndeshjet e fundit të Shqipërisë kanë prodhuar më pak se 2.5 gola.
• Shqipëria ka shënuar saktësisht një gol në secilën nga katër transfertat e fundit.

Lojtarët kyç dhe mungesat: Robert Lewandowski realizoi dy gola ndaj Newcastle me Barcelonën këtë muaj dhe ka shënuar në dy nga tri ndeshjet e fundit të Polonisë, ndërsa ka hapur rezultatin edhe në një nga përballjet e fundit ndaj Shqipërisë në Varshavë. Nga ana tjetër, Kristjan Asllani ka zhbllokuar rezultatin në dy nga katër ndeshjet e fundit kualifikuese të Shqipërisë, ndërsa të pesë golat e tij me kombëtaren kanë ardhur në fitore.

Polonia do të jetë pa Łukasz Skorupski dhe Przemysław Frankowski për shkak dëmtimesh, ndërsa Shqipëria nuk do të ketë në dispozicion Medon Berishën dhe Mirlind Dakun për arsye të ngjashme.