Milionat e Championsit, ja sa ka fituar deri tani secila nga skuadrat çerekfinaliste, kryeson...
UEFA Champions League po i afrohet fazës vendimtare dhe, përveç lavdisë sportive, klubet po përfitojnë edhe shuma të mëdha financiare. Pas përfundimit të fazës së 1/8-ave, janë përcaktuar tetë skuadrat çerekfinaliste, mes tyre edhe tre gjigantët spanjollë: Real Madrid, Barcelona dhe Atletico Madrid.
Të tri ekipet e Spanjës arritën të eliminonin kundërshtarë anglezë dhe vazhdojnë garën për trofeun, por edhe për të ardhurat e majme që ofron kompeticioni. Sistemi i shpërblimeve përfshin një shumë fikse pjesëmarrjeje, bonus për rezultate në fazën e ligës, si dhe shpërblime për çdo raund të kaluar.
Deri në këtë fazë, renditja e fitimeve tregon se klubet angleze dhe gjermane kryesojnë. Arsenal mban vendin e parë me rreth 72.24 milionë euro, i ndjekur nga Bayern Munich me 69.83 milionë dhe Liverpooli me 67.42 milionë euro.
Ndërsa nga skuadrat spanjolle, Barcelona ka arkëtuar rreth 65.39 milionë euro, duke lënë pas Real Madridin me 61.43 milionë dhe Atletico Madridin me 58.45 milionë euro. Në këtë listë përfshihen edhe PSG dhe Sporting CP, që gjithashtu kanë përfituar shuma të konsiderueshme.
Struktura e shpërblimeve është e detajuar: pjesëmarrja garanton mbi 18 milionë euro, ndërsa çdo fitore në fazën e ligës sjell mbi 2 milionë euro. Kalimi në 1/8-at, çerekfinale dhe më tej shton ndjeshëm të ardhurat, ndërsa një vend në gjysmëfinale siguron edhe 15 milionë euro të tjera.
Kulmi arrihet në finale: skuadra që renditet e dyta përfiton rreth 18.5 milionë euro, ndërsa fituesi i trofeut merr plot 25 milionë euro, duke e bërë këtë edicion një nga më fitimprurësit në historinë e kompeticionit.
Me garën që hyn në fazën më të nxehtë, çdo ndeshje tashmë ka vlerë të dyfishtë: për trofeun dhe për miliona euro shtesë në arkat e klubeve.
Më poshtë lista e plotë e fitimeve të deritanishme për skuadrat çerekfinaliste në UEFA Champions League (sezoni 2025-26):
- Arsenal – 72.24 milionë €
- Bayern Munich – 69.83 milionë €
- Liverpool – 67.42 milionë €
- Barcelona – 65.39 milionë €
- Sporting CP – 64.76 milionë €
- Real Madrid – 61.43 milionë €
- PSG – 60.10 milionë €
- Atletico Madrid – 58.45 milionë €